Սիրիայում անօդաչու թռչող սարքերով և հրթիռներով գրոհել են ամերիկյան բազան

Սիրիայի արևելքում գտնվող Դեյր-էզ- Զոր շրջանում գտնվող «Օմար» նավթահանքում գտնվող ամերիկյան բազայում պայթյուններ են հնչել, ՌԻԱ Նովոստիին հայտնել է տեղական աղբյուրը։

«Ալ-Մայադին» հեռուստաալիքը՝ վկայակոչելով աղբյուրների, հաղորդում է, որ բազան գրոհել են  անօդաչու թռչող սարքերով և հրթիռներով:

Ավելի վաղ Պենտագոնի ղեկավար Լլոյդ Օսթինը հայտարարել էր, որ ամերիկյան ինքնաթիռները հարձակվել են Սիրիայում երկու թիրախների վրա, որոնք, իբր, օգտագործվել են Իսլամական հեղափոխության պահապանների կորպուսի և իրանամետ խմբավորումների կողմից։ Նա ընդգծել է, որ պայթյունները կապված չեն պաղեստինա-իսրայելական հակամարտության հետ։

Պենտագոնի խոսնակ Պատրիկ Ռայդերը հայտարարել է, որ հոկտեմբերի 17-ից 26-ը ԱՄՆ զինվորականները 16 հարձակման են ենթարկվել Իրաքում և Սիրիայում: