ԱՄՆ-ն խանգարել է հրադադարին Գազայում. Իրանի նախագահ
ՄԻՋԱԶԳԱՅԻՆ
Միացյալ Նահանգները խանգարել է հրադադարին Գազայում, ասել է Իրանի նախագահ Էբրահիմ Ռայիսին Սաուդյան Արաբիա մեկնելուց առաջ, որտեղ մասնակցելու է Իսլամական համագործակցություն կազմակերպության ղեկավարների հանդիպմանը, տեղեկացրել է Mehr-ը։
«Աշխարհը պետք է ճանաչի ԱՄՆ իսկական դեմքը։ Մենք պետք է ճանաչենք թշնամուն։ Այս հանդիպմանը սպասում են մարդիկ, հատկապես իսլամական ումման։ Իսլամական երկրները պետք է հավաքվեն միասին եւ Պաղեստինի վերաբերյալ վճռական որոշում կայացնեն»,- ասել է Իրանի նախագահը՝ ավելացնելով, որ պաղեստինյան հարցը պարզապես համաժողովում արտահայտվելու եւ դիրքորոշում հայտնելու համար չէ»,- ասել է Ռայիսին։
Անհրաժեշտ է հասնել ռմբակոծությունների դադարեցմանը, հանել Գազայի շրջափակումը, ավելացրել է Իրանի նախագահը։ Նա նշել է, որ Իսլամական համագործակցություն կազմակերպության ստեղծման նպատակը նաեւ պաղեստինյան հարցի լուծումն է։
«Այդ հանդիպման ժամանակ մենք կդառնանք Պաղեստինի խնդրի շուրջ իսլամական երկրների միասնականության եւ մերձեցման վկաները»,- ավելացրել է ԻԻՀ նախագահը։
