Խոշոր հրդեհ` Շիրակի մարզում․ Գյումրիում վագոն-տնակն ամբողջությամբ վերածվել է մոխրակույտի

Երեկ՝ դեկտեմբերի 29-ին, խոշոր հրդեհ է տեղի ունեցել Շիրակի մարզում։ Ժամը 12։10-ի սահմաններում ՀՀ Ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Գյումրի քաղաքի Երևանյան խճուղում՝ «Vesta» էլեկտրոնիկայի խանութի հետնամասում գտնվող թիվ 147/308 տնակում հրդեհ է բռնկվել։

Ինչպես հայտնում է ֆոտոլրագրող Գագիկ Շամշյանը, դեպքի վայր են ժամանել Գյումրու թիվ 48 հրշեջ-փրկարարական ջոկատից 1 մարտական հաշվարկ։

Հրշեջները նախ կանխել են կրակի տարածումը, ապա մարել այն։

Այրվել են տնակն ու խորդանոցը ամբողջությամբ և ներսում պահվող կենցաղային իրերը, իսկ հրդեհի հարևանությամբ գտնվող քարե տնակից մասամբ այրվել է պատուհանը, ջերմահարվել է տանիքի կառուցատարերից մեկ քանի քառակուսի մետր հատված։

Ըստ նախնական տեղեկությունների՝ հրդեհի հետևանքով բարեբախտաբար տուժածներ չկան։