Դեմ եմ Սահմանադրությունը «սրբազան կով» դիտարկելու փորձերին, այն ապրող փաստաթուղթ է․ Վլադիմիր Վարդանյան

Սահմանադրությունը պետք է դիտարկենք երկու տեսանկյունից՝ Սահմանադրությունը որպես բուն տեքստ և Սահմանադրությունը որպես քաղաքացիների կամ սահմանների կամք։

Այս մասին, անդրադառնալով  Սահմանադրությունը փոխելու մասին քննարկումներին, ասաց իշխանական պատգամավոր Վլադիմիր Վարդանյանը։

«Բացառություն չեմ լինի, եթե ասեմ, որ որոշ սահմանադրությունների ընդունման հանրաքվեների հետ կապված տարատեսակ մեկնաբանություններ են եղել առ այն, թե ինչպես է այդ տեքստը ընդունվել, արդյո՞ք այն ստացել կամ չի ստացել քաղաքացիների մեծամասնության քվե կամ ինչ եղանակով է ստացել։ Այս ամենը մշտապես քննարկվել է 2018-ից սկսած, որ եթե անգամ տեքստը մնում է նույնը, մենք պետք է հասկանանք` քաղաքացիների կամքը իրո՞ք այսպիսին է։

Ես ուզում եմ, որ մենք Սահամանդրությունը դիտարկենք որպես ապրող փաստաթուղթ, որը հասարակական հարաբերությունների զարգացման փուլում կարիք է ունենում փոփոխությունների։ Այս տեսանկյունից ՀՀ-ն ոչ առաջինն է, ոչ վերջինը։ Ի վերջո որոշողը ոչ թե ես եմ կամ դուք, այլ սահմանադիրն է, որը քվեարկելու է։ Այս պահի դրությամբ կա գաղափար ու կփորձենք հասկանալ՝ որ ճանապարհով ենք գնում»,- ասաց նա։

Հարցին՝ չի՞ բացառում, որ հնարավոր նոր Սահմանադրության մեջ չի լինի հղում Անկախության հռչակագրին, Վարդանյանն ասաց․

«Էլի եմ ասում, ես չեմ հրաժարվողը, ոչ էլ դուք եք հրաժարվողը։ Եթե Սահմանադրության նոր տեքստը դրվի հանրաքվեի, ապա սահմանադիրն է  որոշելու Սահմանդրության մեջ ինչ տեքստ է լինելու»։

Լրագրողի դիտարկմանը, որ ընդդիմությունը վստահ է, որ Սահմանադրությունը փոխելը Ադրբեջանի պահանջն է, պատգամավորը ասաց․

«Մենք ավելի շատ ենք արծարծում այս խնդիրը, քան ադրբեջանական ԶԼՄ-ները։ Ոչ մի Սահմանադրություն ճնշումներով չի կարող և չպետք է ընդունվի, որովհետև եթե ընդունվում է ճնշումներով, մենք ինքնիշխանութան հետ կապված խնդիրներ ենք ունենում։ Փաստաթղթի նախաբանը ընդամենը դրույթներ է, որոնք անհրաժեշտ կարող են լինել  որոշակի պայմաններում՝ մեկնաբանելու սահմանադրական այս կամ այն նորմը։

Նոր Սահմանադրության մեջ կարող է ավելի մեծ հղում լինի Անկախության հռչակագրին, կարող  ավելի փոքր հղում լինի, կա միայն գաղափար, և որոշողը ժողովուրդն է լինելու։ Հիմա ցանկացած դատողություն անելը տեսքի վերաբերյալ  կարող է լինել միայն գիտական, վերլուծական մակարդակի։ Ես միշտ դեմ եմ եղել Սահմանադրությունը շաբաթը մեկ փոխելու փորձերին, ես դեմ եմ  նաև Սահմանադությունը «սրբազան կով» դիտարկելու փորձերին, այն ապրող փաստաթուղթ է»,- ասաց Վարդանյանը։