«Ադրբեջանը միշտ եղել է Չեխիայի հուսալի գործընկերը». Բաքվում հայտարարել է Չեխիայի Պատգամավորների պալատի նախագահը

Ադրբեջանը միշտ եղել է Չեխիայի հուսալի գործընկերը։

Այս մասին Բաքվում հայտարարել է Չեխիայի խորհրդարանի Պատգամավորների պալատի նախագահ Մարկետա Պեկարովան։

Չեխ պաշտոնյան Բաքու այցից առաջ Երևանում էր, որտեղ հայտարարել է, թե «բոլոր հնարավորությունները կօգտագործեն՝ ճնշում գործադրելու Բաքվի վրա՝ բանակցություններին մասնակցելու համար»։

Բաքվում՝ Ադրբեջանի օրենսդիր մարմնի ղեկավար Սահիբա Գաֆարովայի հետ հանդիպմանը, ըստ ադրբեջանական կողմի հաղորդագրության, Պեկարովան հայտարարել է՝ Չեխիան ուրախ է իր աջակցությունը հայտնելու Ադրբեջանի և Հայաստանի միջև երկխոսության շարունակությանը՝ Հարավային Կովկասում կայուն խաղաղության ու բարեկեցության հասնելու համար։

Ադրբեջանական կողմի հաղորդագրության համաձայն՝ չեխ պաշտոնյան նաև վստահեցրել է, որ ԵԽԽՎ-ից ադրբեջանական պատվիրակությանը վտարելու հարցի քննարկմանը Պրահան չի մասնակցել և չի աջակցել այդ քայլերին։