Ողբերգական վթար՝ Արարատում․ բախվել են BMW-ն ու «07»-ը, 1 զոհ ու 3 վիրավոր կան

Երեկ՝ փետրվարի 11-ին, ողբերգական ավտովթար է տեղի ունեցել Արարատի մարզում։ Ժամը 21։50-ի սահմաններում Այգեվան գյուղի վարչական տարածքում բախվել են BMW և VAZ 2107 մակնիշի ավտոմեքենաները։

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 4 հոգի, որոնց առաջինը օգնության են հասել քաղաքացիները, «Արարատ» բժշկական կենտրոնի շտապօգնության բժիշկները և ՀՀ ներքին գործերի նախարարության փրկարար ծառայության Վեդիի թիվ 26 հրշեջ փրկարարական ջոկատի փրկարարները, տարբեր աստիճանի մարմնական վնասվածքներով տեղափոխվել են Վեդիի բժշկական կենտրոն։

Մինչ դեպքի վայրում պարեկները սահմանազատել էին տարածքը և սպասում էին քննչական խմբի ժամանմանը հիվանդանոցից ահազանգ է ստացվում ոստիկանության Արարատի բաժին, որ վիրավորներից մեկը, գիտակցության չգալով, մահացել է։

Վթարի փաստով Վեդիի քննչական բաժնում նախաձեռնվել է քրեական վարույթ, որտեղ էլ պարզվում են վարորդների, մահացածի և վիրավորների ինքնությունը։

Քննիչի հանձնարարականով ավտոմեքենաները տեղափոխվել է ոստիկանության Արարատի բաժնի պահպանվող հատուկ տարածք։