Ճապոնիան 2 տիեզերագնաց կուղարկի Լուսին

Ճապոնիան, ամերիկյան Artemis ծրագրի շրջանակում, նախատեսում է երկու տիեզերագնաց ուղարկել Լուսին։ Այս մասին հայտնում է Yomiuri թերթը։

Ճապոնացի տիեզերագնացները Լուսնի վրա պետք է լինեն 2028 թվականին կամ ավելի ուշ։ Երկրի բնական արբանյակի մակերեսին բարեհաջող վայրէջքի դեպքում նրանք կկառավարեն Luna Cruiser ռովերը, որը ներկայումս մշակվում է Toyota Motor Corporation-ի ղեկավարությամբ։

Պարբերականի տվյալներով՝ ճապոնացի տիեզերագնացներին Լուսին ուղարկելու պայմանավորվածություն ձեռք կբերվի ապրիլի 10-ին՝ Ճապոնիայի վարչապետ Ֆումիո Կիսիդայի՝ ԱՄՆ այցի ժամանակ։