Ջերմուկ տանող գլխավոր ճանապարհը փակ է

Այսօր՝ մարտի 20-ին, արտակարգ իրավիճակ է ստեղծվել Վայոց ձորի մարզում: Արդեն 30 րոպեից ավելի է՝ Երևան-Մեղրի Մ2 ավտոճանապարհին՝ դեպի Ջերմուկ՝ հսկայական ժայռաբեկորների ու քարերի թափման հետևանքով ճանապարհն ամբողջությամբ դարձել է անանցանելի:

Ինչպես դեպքի վայրից հայտնում է ֆոտոլրագրող Գագիկ Շամշյանը, բարեբախտաբար տուժածներ չկան:

Օպերատիվորեն ժամանել են ՀՀ Ներքին գործերի նախարարության Փրկարար ծառայության Վայոց ձորի մարզային փրկարարական վարչության թիվ 67 հրշեջ-փրկարարական ջոկատից 1 մարտական հաշվարկ:  

Ժամանել են նաև ՀՀ ՆԳՆ ոստիկանության Պարեկային ծառայության Վայոց ձորի մարզի գումարտակի պարեկները:

Տարածքը պարեկներն ու փրկարարները սահմանազատել են, տեղում իրականացրել են հերթապահություն:
 
Ճանապարհը բացելու համար պետք է օգտագործվի հատուկ տեխնիկա:

Խնդրի մասին արդեն տեղեկացվել է Վայոց ձորի մարզպետարանին և Ճանապարհային դեպարտամենտին:

Այս պահին պարեկներն ու փրկարարները սպասում են, մինչև ժամանեն ճանապարհը սպասարկող ճանշինականները: