Ծանոթ ու միաժամանակ անհայտ … սանրվածք «բոքս»

Ցավոք, շատ տղամարդիկ սովոր չեն պատշաճ ուշադրություն դարձնել իրենց արտաքինին, այդ թվում` մազերի վիճակին. մաքուր մազեր, և վերջ:

Բայց լավ սանրվածքը լրացնում է ոչ միայն գեղեցիկ տիկնանց կերպարը: Յուրաքանչյուր իրեն հարգող տղամարդ նույնպես չի կարող իրեն պատկերացնել առանց ոճային սանրվածքի։

Իսկ եթե դրա համար ժամանակ կամ ցանկություն չկա, ապա կարելի է ընտրել սանրվածք, որը կլուծի միանգամից մի քանի խնդիր։

Այն կլինի ժամանակակից, թրենդային, և միևնույն ժամանակ չի պահանջի հատուկ խնամք և ջանքեր։

Բոքս սանրվածքը հենց այսպիսին է: Այն դասական, պահպանողական սանրվածք է՝ կարճ կտրված մազեր, կոկիկ քունքային և գլխի հետին մասեր:

Այն իր կրողի կերպարին հաղորդում է գրավչություն և բրուտալություն: Ընդգծում է հաջողակ մարդու էլեգանտ ոճը, ով վստահ է իր և իր կարողությունների վրա։ Իսկ ինչպե՞ս է առաջացել բոքս սանրվածքը. այն թվագրվում է անցյալ դարով։ Սկզբում բոքս սանրվածք կրում էին միայն համանուն սպորտի՝ բռնցքամարտի պրոֆեսիոնալներն ու սիրահարները:

Այդ փաստը կարելի է բացատրել նրանով, որ այդ սանրվածքով նախատեսված մազերի երկարությունը 3-4 սմ-ից ոչ ավելի է, ինչը շատ հարմար է բռնցքամարտիկին ինտենսիվ մարզումների և մենամարտերի ժամանակ. մազերը չեն շեղում մարտից և չեն փակում աչքերը։ Հետագայում սանրվածքը գրավել է միլիոնավոր տղամարդկանց` ամբողջ աշխարհով մեկ: Այժմ տղամարդիկ հաջողությամբ համադրում են այն, թե՛ գործնական տեսքի, թե՛ առօրյա ոճի հետ։

Հայտնի մարդկանց շրջանում ևս կան բոքս սանրվածքի սիրահարներ։ Օրինակ` ամերիկացի դերասան Բրեդ Փիթը, անգլիացի ֆուտբոլիստ Դեյվիդ Բեքհեմը, իռլանդացի կինոդերասան Քոլին Ֆարելը, ամերիկացի երգիչ Ջասթին Թիմբերլեյքը, դերասան Ուենթվորթ Միլլերը և շատ այլ աստղեր։

Ըստ երևույթին, տղամարդկանց բոքս սանրվածքը երբեք դուրս չի գա նորաձևությունից: Այդ ունիվերսալ սանրվածքն ունի երկրպագուների հսկայական բանակ արդեն հարյուր տարուց ավելի:

Որպես կանոն, այն ընտրում են պահպանողականները, ովքեր ամեն ինչում նախընտրում են հակիրճությունն ու զսպվածությունը։ Այն միշտ մազերը դարձնում է կոկիկ և խնամված: Սանրվածքը ոճավորում կամ այլ խնամք չի պահանջում անգամ լվանալուց հետո: Սանրվածքի գլխի գագաթային հատվածում մազերը ավելի երկար են լինում, որի շնորհիվ դեմքն ավելի կլոր չի երևում: Սանրվածքը հնարավորինս բացահայտում է իր տիրոջ դեմքը՝ ուշադրությունը կենտրոնացնելով աչքերի և շուրթերի դիմագծերի վրա։

Բացի դա, մարդիկ կարող են ինքնուրույն ստանալ այս սանրվածքը տանը, եթե ունեն մազ կտրող և հարդարող գործիք օգտագործելու հիմնական հմտություններ:

Ցանկացած տարիքի տղամարդ կարող է իրեն թույլ տալ այս ոճը՝ մեկ տարեկան երեխայից մինչև ալեհեր պապիկ:

Ավելորդ նյուանսների բացակայությունը և մազերի կարճությունը տղամարդու արտաքին տեսքին հաղորդում են շքեղություն, փայլ և յուրահատկություն։ Իսկ ո՞վ պետք է խուսափի բոքս սանրվածքից. ստորին հատվածը ընտրելիս պետք է զգույշ լինել, քանի որ ինչքան կարճ լինեն գլխի հետևի մազերը, այնքան ավելի հստակ կերևան գլխի սպիները, բշտիկները և անհարթությունները, եթե դրանք առկա են։

Այս սանրվածքից պետք է խուսափեն նաև շատ գեր մարդիկ, քանի որ կարճ մազերը «կոտրում» են կազմվածքը, նրանք, ըստ էության, ավելի գեր են երևում։

Կ. Խաչիկյան