Արտակարգ դեպք՝ Երևանում. մեքենա է այրվել

Այսօր՝ հուլիսի 9-ին, արտակարգ դեպք է տեղի ունեցել Երևանում: Ժամը 12:00-ի սահմաններում ՀՀ ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Արին Բերդի փողոցի 54/7 հասցեի մոտակայքում ավտոմեքենա է այրվում:

Ինչպես դեպքի վայրից հայտնում է ֆոտոլրագրող Գագիկ Շամշյանը, ժամանել են Երևանի թիվ 6-րդ հրշեջ-փրկարարական ջակոտից 1 մարտական հաշվարկ:

Լրացուցիչ ժամանել է նաև թիվ 3-րդ փրկարարական ջոկատից 1 մարտական հաշվարկ:

Մինչ հրշեջների ժամանումը՝ Արին Բերդի փողոցում՝ գործարանի հարևանությամբ կայանված «Lexus» մակնիշի ավտոմեքենայում առաջացած կրակի դեմ պայքարել են քաղաքացիներն ու վարորդը:

Հրշեջները մարել են ավտոմեքենայում առաջացած կրակը, սակայն այն ամբողջությամբ վերածվել է մոխրակույտի:

Ֆոտոլրագրողը հայտնում է, որ հրդեհի հետևանքով բարեբախտաբար տուժածներ չկան: Վարորդը ավտոմեքենան կայանել է նշված վայրում, իջել է, և ընկերոջ հետ զրույցի է բռնվել, երբ նկատել է, որ ավտոմեքենան այրվում է:

Ավտոմեքենայում է եղել նաև նրա կինը, ում վարորդը կարողացել է արագ դուրս բերել ավտոմեքենայից: