Ի՞նչ ուժեղացված ծառայություն էին իրականացնում ոստիկանները երեկ Խանջյան փողոցում

Երեկ համացանցում բուռն քննարկության առարկա դարձավ տեսանյութը, որտեղ երևում է, որ Խանջյան փողոցում մեծաթիվ ոստիկանական ուժեր ուժեղացված ծառայություն են իրականացնում։

MediaHub-ը դիմեց ՆԳՆ՝ հասկանալու, թե ի՞նչ էր կատարվում երեկ Խանջյան փողոցում։

«Հուլիսի 15-ի ժամը 20-ից 23-ը մայրաքաղաքում ոստիկանությունն իրականացրել է ուժեղացված ծառայություն։ Ներգրավված էին Քրեական ոստիկանության և հասարակական անվտանգության ապահովման գլխավոր վարչությունների, Ոստիկանության զորքերի, Հատուկ նշանակության գումարտակի, Պարեկային ծառայության, Երևան քաղաքի վարչության ու ենթակա ստորաբաժանումների ծառայողներ: Ընդհանուր ներգրավված էր 300 ոստիկան, կազմվել էր շարժական 10 խումբ»,- հայտնեց ՆԳՆ մամուլի ծառայությունը:

Ըստ նախարարության՝ ուժեղացված ծառայության ընթացքում ստուգվել է 520 տրանսպորտային միջոց, տարբեր իրավախախտումների և պարզաբանումների համար Երևան քաղաքի վարչության ենթակա բաժիններ է տեղափոխվել 54 անձ:

Բացի այդ, արձանագրվել է թմրամիջոցի հայտնաբերման 16 դեպք, հայտնաբերվել են 9 սառը զենք և երկու գազային ատրճանակ: Հայտնաբերվել են նաև 2 օդաճնշիչ ատրճանակ, 1 որսրոդական հրացան, 1 մեկնարկային ատրճանակ, 4 մահակ և կացին։

«3 անձի մոտ հայտնաբերվել է վարորդական իրավունքի կեղծ վկայական»,- նշեց իրավապահ կառույցը: