Իվան Ուրգանտը վերադառնում է եթեր 

Հեռուստահաղորդավար Իվան Ուրգանտը կարող է վերադառնալ ռուսական «Առաջին ալիքի» եթեր՝ Ամանորյա տոնական հաղորդումների ժամանակ։ Համաձայն ռուսական մամուլում տեղ գտած հրապարակումների, «Երեկոյան Ուրգանտի» նախկին հաղորդավարի թիմն արդեն աշխատում է «Առաջին ալիքում» եւ այլ նախագծերում։ Հաղորդավարը ներկայումս ակտիվորեն հանդես է գալիս որպես հանդիսավար կորպորատիվներում։ Նաեւ վաճառել է իր դատարկ թերթերով գիրքը։ Գարնանը նա հայտարարել էր, որ վերադառնում է կինո՝ «Քնի մեջ դառնորեն արտասվում էիր» ֆիլմով։

2022 թվականի գարնանից ի վեր, դա կարող էր լինել նրա առաջին վերադարձը էկրան։ Սակայն մայիսին հայտնի դարձավ, որ նշված կինոնկարի համար կինովարձույթ դուրս գալու արտոնագիր չի տրամադրվել։ ՌԴ Մշակույթի նախարարությունն էլ հայտարարել էր, որ իրենք համապատասխան հայտ չեն ստացել՝ արտոնագիր տրամադրելու։ Ուրգանտը, ինչպես շատ ռուսական մտավորականներ, Ռուսաստանից հեռացել էր ռուս-ուկրաինական պատերազմի մեկնարկից հետո՝ որպես բողոքի նշան ընդդեմ եղբայրասպան պատերազմի։