Աբխազիայի խորհրդարանը դեմ է քվեարկել Ռուսաստանի հետ համաձայնագրի վավերացմանը

Աբխազիայի խորհրդարանը դեմ է քվեարկել ՌԴ իրավաբանական անձանց կողմից հանրապետությունում ներդրումային նախագծերի իրականացման մասին համաձայնագրի վավերացմանը, հայտնել է ՏԱՍՍ-ի թղթակիցը։

Հոկտեմբերի 30-ին Մոսկվայում այս համաձայնագիրը ստորագրել էին Աբխազիայի փոխվարչապետ, էկոնոմիկայի նախարար Քրիստինա Օզգանը և ՌԴ տնտեսական զարգացման նախարար Մաքսիմ Ռեշետնիկովը։ Նոյեմբերի 15-ին Աբխազիայի խորհրդարանում պետք է տեղի ունենար պայմանագրի վավերացումը, սակայն այս համաձայնագրին դեմ հանդես եկող ընդդիմությունն անկարգություններ էր կազմակերպել։ Դրա հետևանքով հրաժարական էին տվել Աբխազիայի նախագահ Ասլան Բժանիան և վարչապետ Ալեքսանդր Անկվաբը։