Հայաստանի պետական սիմֆոնիկ նվագախումբը հանդես կգա Դուբայի օպերայում

Հայաստանի պետական սիմֆոնիկ նվագախումբը հունվարի 17-19-ը Արաբական Միացյալ Էմիրությունների Դուբայ քաղաքում ներկայացնելու է «Սիմֆոնիկ ռոք» համերգաշարը։  Նվագախումբը մեկնում է ԱՄԷ Դուբայի օպերայի հրավերով։

Հունվարի 17-ին և 18-ին նվագախումբը կներկայացնի «Լեդ Զեփելին» և «Նիրվանա» ռոք խմբերի, իսկ հունվարի 19-ին՝ փոփի արքա Մայքլ Ջեքսոնի համաշխարհային ճանաչում վայելող երգերի սիմֆոնիկ մեկնաբանությունները։

«Սիմֆոնիկ Զեփելին» և «Սիմֆոնիկ Նիրվանա» համերգները միջազգային մեծ ճանաչում ունեցող նախագծեր են, որոնք պարբերաբար կատարվում են ամբողջ աշխարհում։ 2022 թվականին Հայաստանի պետական սիմֆոնիկ նվագախումբը «Սիմֆոնիկ Զեփելին»-ը ներկայացրել է նաև հայ հանդիսատեսին։ «Սիմֆոնիկ Ջեքսոն» համերգային ծրագիրն էլ բացառիկ է նրանով, որ ստեղծվել է Հայաստանում՝ Հայաստանի պետական սիմֆոնիկ նվագախմբի նախաձեռնությամբ։

«Առաջին անգամ է, որ «Սիմֆոնիկ Ջեքսոն» նախագիծը մենք ներկայացնում ենք միջազգային բեմում։ Մեծ հաջողություն է՝ Հայաստանում ստեղծել նման որակյալ նախագիծ և այն ներկայացնել դրսում»,- ասում է Հայաստանի պետական սիմֆոնիկ նվագախմբի տնօրեն Սարգիս Բալբաբյանը։

Նվագախմբից հայտնում են, որ «Սիմֆոնիկ Զեփելին» և «Սիմֆոնիկ Նիրվանա» համերգները ղեկավարելու է Միացյալ Թագավորությունից հրավիրված դիրիժոր  Ռիչարդ Սիդվելը, իսկ «Սիմֆոնիկ Ջեքսոն» համերգը՝ Հայաստանի պետական սիմֆոնիկ նվագախմբի գեղարվեստական ղեկավար և գլխավոր դիրիժոր Սերգեյ Սմբատյանը։