Հայկոյի և Անահիտ Սիմոնյանի որդու առաջին քայլերը դպրոց

Life.Tert.am-ը գրում է.

Հուզմունք, ուրախություն և փոքրիկ անհանգստություն Հայկոյի և Անահիտ Սիմոնյանի աչքերում. երիտասարդ զույգը որդուն` Արմանին, այսօր ուղեկցեց առաջին դասարան։ Tert.am Life–ը հետևել է արարողությանն ու իր ընթերցողներին է ներկայացնում Արմանի առաջին քայլերը դպրոցում։

Նա Երևանի Պուշկինի անվան թիվ 8 դպրոցի սան է։ Դպրոցի ընտրությունը ծնողները պատահական չեն արել։ Անահիտը նկատեց, որ այն լավ դպրոց է և շատ գիտելիքներ կտա որդուն։ Դե իսկ Հայկոն կարևորեց, որ այն գտնվում է Երևանի սրտում։ «Ուրախ ենք, որ Արմանը Երևանի սրտում գտնվող Պուշկինի դպրոցում է սովորելու։ Դա էլ, երևի, իր խորհուրդն ունի, որպեսզի երեխաները հոգով-սրտով զգան մեր քաղաքի շունչը»,– նկատեց հայրիկը։

Արդեն դպրոցական Արմանի ծնողները փոքր–ինչ հուզված էին։ «Անսպասելի էր, որ այս պահն այսքան արագ եկավ։ Շատ հուզված եմ, միաժամանակ` ուրախ»,– նշեց Հայկոն։ Անահիտը ևս ասաց, որ շատ հուզված ու շփոթված է։ «Առավոտյան, երբ վերջին պահին հասցրեցինք իր հագուստը, ուզում էի արդեն արտասվել, որովհետև շատ կարևոր պահ է»,– ասաց երգչուհին։

Ի դեպ, Անահիտն այսօրվան հատուկ էր պատրաստվել. մայր ու որդի միանման հագուստով էին։ Առհասարակ, որդին հագնվում է իր դիզայնով։ Դպրոց գնալիս էլ Արմանը կհագնի մայրիկի ընտրած սև–սպիտակ հագուստը։ Երգչուհին նշեց, որ որդին սիրով լսում է իր խորհուրդները։

Ընտանիքի գլխավոր «խնդիրը» առավոտյան Արմանին դպրոց բերելն է։ Հայկոն նկատեց, որ իրենք ավելի դժվար են արթնանում, քան Արմանը։ «Երեխաների համար ավելի հեշտ է։ Մենք պետք է լուծենք մեր հարցերը:) Ասում են՝ Անահիտն է բերելու դպրոց, բայց ենթադրում եմ, որ ես կբերեմ»,– ժպիտով ասաց հայրիկը։ Անահիտն էլ անկեղծ ծիծաղով նկատեց, որ ինքը չի բերելու տղային դպրոց, հետո հավելեց, որ օրը կթելադրի, թե ով Արմանին կուղեկցի դպրոց։

Հայկոն նշեց, որ կնոջ հետ հաճույքով կկիսի ծնողական պարտականությունները, կմասնակցի ծնողական ժողովներին։

Շարունակությունն՝ այստեղ.