Օդեսայում մի խումբ ադրբեջանցիներ զանգվածային ծեծկռտուք են հրահրել. ՏԵՍԱՆՅՈՒԹ

Օդեսայում մի խումբ ադրբեջանցիներ զանգվածային ծեծկռտուք են հրահրել, որի ականատես է դարձել հասարակական ակտիվիստ Վիկտորիա Սիբիրը: Այս մասին հաղորդում է քաղաքի  կայքը:

Վիկտորիա Սիբիրի խոսքով՝ կեսգիշերն անց քաղաքի փողոցներից մեկով մեծ արագությամբ BMW ավտոմեքենա է անցել: Քանի որ դեպի մյուս փողոց անցումը փակ է եղել, մեքենան հետ է դարձել: Փողոցի մեջտեղում նրանց արդեն Օդեսայի բնակիչներ են սպասել՝ ցանկանալով բացատրել, որ փողոցը հետիոտնի է եւ այնտեղ ավտոմրցարշավ կազմակերպել չի կարելի: Մեքենայում 5 ադրբեջանցի է եղել:

Նրանք հայհոյախառն արտահայտություններ են օգտագործել, հայտարարել են, որ «լեռներից են եւ իրենց օրենքն ունեն», իսկ ակտիվիստների հետ «ամբողջ ադրբեջանական համայնքը կխոսի»: «Հաճոյախոսությունների փոխանակման» ընթացքում BMW-ի վարորդը մեքենայով հարվածել է բնակիչներից Անատոլի Մազուրին եւ նրան ավելի քան 300 մետր քշել-տարել մեքենայի թափքի վրա:

Ակտիվիստներն ու ադրբեջանցիներն ավելի քան երեք ժամ վիճաբանել են նաեւ իրավապահների ներկայությամբ, որոնք կանգնած դիտել եւ չեն միջամտել: