Քիմ Քարդաշյանն ու Քանյե Ուեսթը մոտ 2 մլն դոլար են ծախսել իրենց 3-րդ երեխայով հղի կնոջ շուրջօրյա անվտանգության համար. The Daily Mail
ՖՈՏՈ
Լրատվամիջոցներում հայտնված տեղեկության համաձայն՝ ամերիկյան հեռուստաաստղ Քիմ Քարդաշյանն ու նրա ամուսինը՝ ռեփեր Քանյե Ուեսթը, պատրաստվում են հունվարին 3-րդ երեխան ունենալ: Ըստ քաջատեղյակ աղբյուրների՝ 36-ամյա Քարդաշյանն առողջական խնդիրների պատճառով չի ցանկացել նորից հղիանալ, ուստի՝ զույգը դիմել է փոխնակ մոր օգնությանը:
Ինչպես նշում է The Daily Mail-ը, աստղային զույգն արդեն 2 մլն դոլար է ծախսել իրենց ապագա փոքրիկին կրող կնոջ շուրջօրյա անվտանգության ապահովման համար:
Նրանց համար առաջնային է, որ փոխնակ մոր ինքնությունը գաղտնի մնա ու որ նա կարողանա լիակատար հանգստի մեջ անցկացնել հղիության վերջին 2 եռամսյակը:
«Քիմն ու Քանյեն Լոս Անջելեսից ոչ հեռու տուն են վարձել, որտեղ բոլորի հետաքրքրասեր աչքից հեռու ապրում է փոխնակ մայրը: Դա այնպիսի սովորական վայր է, որ երբեք չեք մտածի, թե այնտեղ կարող է նման հարուստ զույգի հետ համագործակցող փոխնակ մայրն ապրել»,-պատմել է քաջատեղյակ աղբյուրը:
Զույգի պահանջով կնոջը կցվել է օր ու գիշեր նրան հսկող 9 թիկնապահ, բացի այդ, նա անձնական վարորդ ունի: Այս ամենի վրա զույգը ծախսել է մոտ 2 մլն դոլար:
Ավելի վաղ Քարդաշյանն ասել էր, որ իրենք փոխնակ մայր վարձելու վերաբերյալ դեռևս պաշտոնական հայտարարություն չեն արել ու ոչինչ չեն հաստատել:
«Երբ ժամանակը գա ու մենք պատրաստ լինենք՝ ես ամեն ինչ կպատմեմ»,-ասել է հայազգի գեղեցկուհին:
Նշենք, որ աստղային զույգի ամուսնությունից ծնվել է 2 երեխա՝ աղջիկ և տղա:
