Հղիության 9 ամիսները՝ 4 րոպեանոց տեսանյութում. Ահա՝ ինչպես է դա տեղի ունենում

Հղիությունը և նախապատրաստվելը դրան

Մինչև բեղմնավորումը
Եթե ձեր ամուսինը և դուք որոշել եք երեխա ունենալ‚ ապա պետք է քննադատաբար և գիտակցաբար գնահատեք ձեր ապրելակերպը‚ ինչպես նաև ընդհանուր առողջական վիճակը։ Դա հարկավոր է անել նախօրոք` հղիությունից 1-3 ամիս առաջ։

Հղիանալու որոշումը հիանալի առիթ է առողջ կենսակերպի անցնելու և ծխելը թողնելու համար։ Ծխելու վնասակար ազդեցությունը հղի կնոջ օրգանիզմի վրա հավաստիորեն հայտնի է` պտղի զարգացման դանդաղում‚ թթվածնային քաղց‚ վաղաժամ ծննդաբերություն և բազմաթիվ բարդությունների առաջացման վտանգ։ Պակաս վտանգավոր չէ նաև պասիվ ծխելը։

Ցանկացած ալկոհոլային խմիչքի օգտագործումը, անգամ ամենափոքր քանակությամբ, բեղմնավորման և հղիության ընթացքում անթույլատրելի է, քանի որ թափանցում է պտղի արյան մեջ և պատճառ դառնում զարգացման արատների, մտավոր հետամնացության։ Բացի այդ, ալկոհոլի օգտագործումը կարող է հանգեցնել վիժման, մեռելածնության, վաղաժամ ծննդաբերության։

Անհրաժեշտ է հետևել սննդակարգին։ Պետք է կրճատել բարձր կալորայնությամբ‚ սննդային ցածր արժեք ունեցող մթերքները` ճարպային և քաղցր ուտեստները։ Ցանկալի է սնունդը հարստացնել ֆոլաթթվով հարուստ մթերքով կամ ընդունել ֆոլաթթվի հաբեր։ Ավելորդ քաշը միայն կվնասի ձեզ։ Քաշի պակասը նույնպես բացասաբար է ազդում դաշտանային ցիկլի վրա և իջեցնում է հղիանալու հավանականությունը։

Հիշեք‚ որ հարկավոր է հետևել քաշին ամբողջ հղիության ընթացքում‚ բայց ոչ մի դեպքում հանուն մարմնակազմվածքի մի սահմանափակեք այն նյութերի քանակը‚ որոնք անհրաժեշտ են պտղի նորմալ զարգացման համար։

Հղիության ընթացքում կանանց կոնսուլտացիա հաճախելիս ձեզ անպայման կհետազոտեն. կկշռեն‚ կչափեն ճնշումը‚ որովայնի շրջագիծը և արգանդի հատակի բարձրությունը, կլսեն պտղի սրտի զարկերը։ Դուք կստանաք մանրակրկիտ խորհրդատվություն սննդի, առողջ ապրելակերպի, ֆիզիկական և սեռական ակտիվության, աշխատանքի, հանգստի ռեժիմի և այլնի վերաբերյալ։

Առաջին այցելության ժամանակ կկատարվեն արյան լայնածավալ‚ մեզի ընդհանուր քննություն‚ քսուքի հետազոտություն` գոնոռեայի, տրիխոմոնիազի, կանդիդամիկոզի հայտնաբերման համար, կգնահատվի ձեր ընդհանուր վիճակը։ Անպայման կհետազոտեն սիֆիլիսի, անհրաժեշտության դեպքում` սեռական ճանապարհով փոխանցվող մյուս վարակների, այդ թվում` ՄԻԱՎ-ի նկատմամբ։ Եթե հղիությունը հաստատված է‚ անպայման կորոշվեն արյան խումբը‚ շաքարի մակարդակն արյան մեջ, ռեզուս-գործոնը‚ որը սպիտակուցային նյութ է և պարունակվում է արյան կարմիր գնդիկներում։ Այն հայտնաբերվում է մարդկանց 85%-ի մոտ (ռեզուս‐գործոնը` դրական), իսկ եթե բացակայում է, նշանակում է արյան ռեզուսը բացասական է։ Եթե տղամարդու արյան ռեզուսը դրական է‚ իսկ կնոջը` բացասական‚ այդ դեպքում պտուղը կունենա ռեզուս դրական պատկանելիություն և հետագա հղիությունների ժամանակ կարող են ծագել որոշ բարդություններ։ Ավելի մանրամասն տեղեկությունների համար դիմեք ձեր բժշկին։

Հղիությունը‚ երեխայի ծնունդը և մայրությունը որոշ փոփոխություններ կմտցնեն մտերիմների հետ ձեր հարաբերությունների մեջ։ Սովորաբար մարդու ծնունդը տոն է և ուրախալի իրադարձություն, բայց որոշ մարդկանց համար դա անհանգստություն է և երբեմն վիճակի բարդացում։ Այդ պատճառով հղիանալուց առաջ խորհրդակցեք ձեր ամուսնու հետ կյանքի սպասվող փոփոխությունների‚ պրոբլեմների մասին։

Երեխայի ծնունդը նշանակում է նաև ծախսերի ավելացում։ Դուք պետք է հոգ տանեք ոչ միայն մանկան մահճակալի‚ հագուստի մասին‚ այլև ամենօրյա ծախսեր նախատեսեք նրա հետագա խնամքի համար։

Պատրաստվում եք հղիանալ

Եթե օգտվում եք հակաբեղմնավորիչներից, դեղահաբերից‚ պարույրից կամ հորմոնային միջոցներից‚ ապա դադարեցրեք դրանց օգտագործումը։

Դաշտանի անկանոնության դեպքում օգտագործեք պահպանակ, որպեսզի դաշտանը կարգավորվի։ Դա պետք է կատարել պլանավորված հղիությունից 3-4 ամիս առաջ։ Նորմալ դաշտանային ցիկլը կարգավորվելուց հետո տեղի է ունենում ձվազատում։ Եթե հղիացել եք հորմոնային դեղահաբերի օգտագործման ժամանակ, խորհրդակցեք բժշկի հետ։

Բեղմնավորման մասին

Յուրաքանչյուր ամիս դաշտանային ցիկլի ընթացքում կնոջ օրգանիզմը պատրաստ է հղիանալու։ Ցիկլի առաջին օրը համարվում է դաշտանի սկիզբը։ Դաշտանի ժամանակ արգանդի խոռոչի լորձաթաղանթը շերտազատվում է և դուրս մղվում։ Դաշտանը տևում է 3-5 օր, որի ավարտից հետո լորձաթաղանթը կրկին վերականգնվում է։ Ցիկլի ընթացքում‚ աջ կամ ձախ ձվարանում‚ որոնք արգանդի հետ կապված են ֆալոպյան փողով‚ ձվաբջիջը սկսում է հասունանալ։ 13-15‐րդ օրը‚ երբ այն արդեն հասունացած է‚ ֆոլիկուլը պատռվում է և տեղի է ունենում ձվազատում, ձվաբջիջը դուրս է գալիս, որը պատրաստ է բեղմնավորման։ Ֆոլիկուլը վերածվում է դեղին մարմնի‚ որը պրոգեստերոն է արտադրում։ Հղիության ամբողջ ընթացքում այս հորմոնը նպաստում է հղիության և էմբրիոնի զարգացմանը։ Քանի որ ձվազատումը տեղի է ունենում 13-15-րդ օրը‚ ապա դաշտանի 1-2 շաբաթով ուշացումը կարող է հղիության կասկած առաջացնել։ Հղիության շաբաթները հաշվում են վերջին դաշտանի սկզբից։

Հիշեք, որ եթե հղիությունը 4 շաբաթվա է‚ ապա սաղմը ընդամենը 2 շաբաթական է։

Սեռական հարաբերության ժամանակ սերմնաժայթքման արդյունքում միլիոնավոր սպերմատոզոիդներ տեղաշարժվում են հեշտոցով դեպի արգանդափողը։ Մի քանի հարյուր սպերմատոզոիդներ ուղղվում են դեպի ձվաբջիջ։ Արտադրելով իրենց հատուկ ֆերմենտը` միայն մեկ սպերմատոզոիդի է հաջողվում ճեղքել ձվաբջջի պաշտպանական շերտը և թափանցել ձվաբջջի մեջ։ Վերջինիս և սպերմատոզոիդի կորիզների միաձուլման պրոցեսը կոչվում է բեղմնավորում։ Այնուհետև սկսվում է հատուկ կենսաքիմիական պրոցես‚ որով կանխվում է մյուս սպերմատոզոիդների ներթափանցումը ձվաբջջի մեջ։ Եվ այսպես սկսվում է սաղմի հետագա զարգացումը։