Եթովպիայի նախագահի պաշտոնում առաջին անգամ կին է ընտրվել
ՄԻՋԱԶԳԱՅԻՆՀայտնի դիվանագետ Սալհե-Վորկ Զևդեն դարձել է Եթովպիայի առաջին կին նախագահը: РИА Новости-ի փոխանցմամբ՝ այս մասին հայտնել են երկրի վարչապետի գրասենյակից:
«Խորհրդարանի երկու պալատն էլ դեսպան Սահլե-Վորկ Զևդեին ընտրել են Եթովպիայի հաջորդ նախագահ, սա պատմական իրադաձություն է»,- թվիթերյան պաշտոնական էջում գրել է վարչապետի գրասենյակի ղեկավար Ֆիթսում Արեգան:
Նախօրեին տեղի աղբյուրը հայտնել էր, որ խորհրդարանը հավանության է արժանացրել նախկին նախագահ Մուլատու Տեշոմեի հրաժարականը, որը երկիրը ղեկավարում էր 2013 թվականից:
Այսօր կայացել է Զևդեի երդմնակալության արարողությունը: Ելույթ ունենալով արարողության ժամանակ՝ վերջինս խոսել է երկրում խաղաղության պահպանման և կանանց իրավունքների համար պայքարի կարևորության մասին:
Նախկինում Զևդեն ղեկավարել է Եթովպիայի դիվանագիտական առաքելությունները Սենեգալում, Ֆրանսիայում և Ջիբութիում, ինչպես նաև բարձր պաշտոններ է զբաղեցրել ՄԱԿ-ի կառույցներում:
Երկրի սահմանադրության համաձայն՝ նախագահին ընտրում է խորհրդարանը 6 տարի ժամկետով: