Մերձմոսկվայում հատուկջոկատայինի սպանության կասկածյալը կարող է Ռուսաստանից Հայաստան մեկնած լինել. ԶԼՄ-ներ

ՌԴ Գլխավոր հետախուզական վարչության նախկին հատուկջոկատային Նիկիտա Բելյանկինի սպանության կասկածյալը կարող է լքած լինել Ռուսաստանը: Այս մասին հայտնում է Gazeta.ru-ն՝ հղում անելով Baza Telegram-ալիքին:

Աղբյուրի տվյալներով՝ այս մասին հարցաքննության ժամանակ հայտնել են ծեծկռտուքի երկու ձերբակալված մասնակիցները: Telegram-ալիքը մեջբերում է նրանց խոսքն այն մասին, որ կռվից անմիջապես հետո իրենք սպնության հեղինակի համար ավիատոմս են գնել դեպի Հայաստան, և նա, հավանաբար, հասցրել է հեռանալ Ռուսաստանից:

Ներկա պահին այդ տեղեկությունը պաշտոնապես հաստատված չէ:

Ավելի վաղ ՌԴ իրավապահները հայտնել էին, որ պարզել են սպանության կասկածյալներից մեկի ինքնությունը՝ նշելով, որ նա Հայաստանից է:

24-ամյա Նիկիտա Բելյանկինը սպանվել է մերձմոսկովյան Պուտիլկովո թաղամասում: Երիտասարդը փորձել է օգնել մի խումբ մարդկանց կողմից ծեծի ենթարկվող անցորդին, ինչի հետևանքով մահացու վիրավորում է ստացել: