«Ռուսթավի-2»-ի նախկին գլխավոր տնօրենին մեղադրանք է առաջադրվել

Վրաստանի «Ռուսթավի-2» ընդդիմադիր հեռուստաընկերության նախկին գլխավոր տնօրենին մեղադրանք է առաջադրվել «պաշտոնեական լիազորությունները չարաշահելու հոդվածով», նրա նկատմամբ խափանման միջոց է ընտրվել մոտ 13 հազար ամերիկյան դոլարի չափով գրավը:

Մեղքը ապացուցվելու դեպքում վրացական իշխանությունների կոշտ ընդդիմախոսը համարվող Նիկա Գվարամիային սպառնում է խոշոր տուգանք, մինչև 2 տարվա ուղղիչ աշխատանք, մինչև երկու տարվա տնային կալանք կամ 3-5 տարվա ազատազրկում։

Գվարամիայի նկատմամբ քրեական հետապնդումը հաջորդում է «Ռուսթավի-2»-ի ղեկավարի պաշտոնից նրա հեռացմանը:

Պաշտոնանկությունից հետո Գվարամիան հայտարարել է նոր լրատվամիջոց հիմնելու մտադրության մասին: