Չգործող ռեստորանի մոտ անչափահասի են դանակահարել. Կասկածյալին արդեն գտել են

Հունվարի 4-ին՝ ժամը 3․50-ին, «Թալին» բժշկական կենտրոնից ոստիկանության Թալինի բաժին ահազանգ ստացվեց, որ «կրծքավանդակի կտրած-ծակած թափանցող վերք» ախտորոշմամբ իրենց մոտ բուժօգնության է տեղափոխվել Արտենի գյուղի անչափահաս մի բնակիչ։

Ոստիկանության Թալինի բաժնի ծառայողների ձեռնարկած համապատասխան միջոցառումների շնորհիվ պարզվեց, որ նույն օրը Արտենի գյուղի չգործող ռեստորանի հարեւանությամբ տեղի է ունեցել վիճաբանություն եւ ծեծկռտուք, ինչի ընթացքում էլ անչափահասը դանակահարվել է։

Արդյունքում՝ կասկածյալը հունվարի 5-ին ներկայացավ ոստիկանություն եւ խոստովանեց կատարածը։

Հարուցված քրեական գործի քննությունը շարունակվում է։