Տիխանովսկայան հայտարարել է Լուկաշենկոյի կողմից բելառուսների ահաբեկման փորձի մասին
ՄԻՋԱԶԳԱՅԻՆ
Բելառուսի նախագահի ընդդիմադիր թեկնածու Սվետլանա Տիխանովսկայան երկրի նախագահ Ալեքսանդր Լուկաշենկոյի՝ լրիվ մարտական պատրաստվածության մասին հայտարարությունները համարում է ժողովրդին ահաբեկելու փորձ:
«Սա քայլ է, որին մեր ժողովուրդն արդեն սովոր է: Սա սովորական ահաբեկում է: Բայց բելառուսներն այլևս չեն վախենում. նրանք պատրաստ են պաշտպանել իրենց իրավունքները»,- ասել է Տիխանովսկայան:
Նա նաև գտնում է, որ եթե զինվորականներին հրաման տրվի՝ ցրել խաղաղ ցուցարարներին, նրանք դա չեն անի:
«Դա բանակի կողմից հանցագործություն կհամարվի, բելառուսները չեն կարող ծեծել բելառուսներին: Ես ավելի քան վստահ եմ, որ և' բանակում, և' ոստիկանությունում դա հասկանում են»,-ավելացրել է նախագահի ընդդիմադիր թեկնածուն:
Օգոստոսի 22-ին Բելառուսի նախագահ Ալեքսանդր Լուկաշենկոն հանրապետության ռազմական հրամանատարությանը՝ պետության տարածքային ամբողջականության պաշտպանության համար հրամայել է գործածել ամենակոշտ միջոցները: Նա նաև անվտանգության աշխատակիցներին հանձնարարել է երկու օրվա ընթացքում կարգուկանոն հաստատել երկրում:
Նյութը հրապարակման պատրաստեց Լիլիթ Ամիրաղյանը
