Պուտինն առաջին անգամ հրապարակավ մեկնաբանեց Բելառուսի դեպքերը
ՄԻՋԱԶԳԱՅԻՆ«Բելառուսի հետ կապված իրավիճակում Ռուսաստանն իրեն ավելի զուսպ և չեզոք է պահում, քան եվրոպացիներն ու ամերիկացիները»,-այսպես է ՌԴ նախագահ Վլադիմիր Պուտինն առաջին անգամ մեկնաբանել Բելառուսի դեպքերը: Այս մասին հաղորդել է «Россия 1» հեռուստաալիքը:
Պուտինը գտնում է, որ Բելառուսում տեղի ունեցող գործընթացների վրա արտաքին ազդեցություն գործելու փորձերը որոշակի քաղաքական հետաքրքրություններ են հետապնդում: Նա հույս է հայտնել, որ հարևան երկրում իրավիճակը խաղաղ լուծում կստանա՝ ավելացնելով, որ այն արդեն շտկվում է:
ՌԴ նախագահը հայտնել է, որ Լուկաշենկոյի խնդրանքով Ռուսաստանը ստեղծել է իրավապահպան մարմիններից բաղկացած պահեստազոր, որը դեռ չի նախատեսվում օգտագործել:
Բելառուսական իրավապահ մարմինների գործողությունների վերաբերյալ Պուտինն ասել է, որ նրանք իրենց բավականին զուսպ են պահում:
Նյութը հրապարակման պատրաստեց Լիլիթ Ամիրաղյանը: