Վլադիմիր Պուտինը մեքենայով «շրջել է» Իվան Ուրգանտի հետ (տեսանյութ)

Հեռուստահաղորդավար Իվան Ուրգանտը զավեշտալի տեսանյութ է նկարահանել, որում ինքը Ռուսաստանի նախագահ Վլադիմիր Պուտինի հետ նույն մեքենայում է հայտնվել: Այն ցուցադրվել է Առաջին ալիքի եթերում, գրում է РИА Новости-ն:

Տեսանյութի համար կադրեր են վերցվել ՌԴ ղեկավարի՝ օրեր առաջ կատարած շրջայցից Aurus-ի ղեկին, որի ժամանակ վերջինս մասնակցել էր Ղրիմում կառուցվող «Տավրիդա» կամրջի հատվածներից մեկի բացմանը:

Մոնտաժի շնորհիվ Ուրգանտը հայտնվել է ուղեւորի նստարանին: Նրա հարցերը հարմարեցվել են Պուտինի խոսքերին:

Այսպես, ի պատասխան տուգանք չստանալու համար ամրագոտին գցելու անհրաժեշտության մասին նախագահի խոսքերի՝ հաղորդավարը ասում է, որ մտածում էր, թե իրենցից ով առաջինը կկատակի:

«Դուք ինձնից առաջ ընկաք»,- ասում է Ուրգանտը:

Ճանապարհին հաղորդավարը նախագահին Դոնալդ Թրամփի, ինչպես նաեւ դոլարի ու ռուբլու մասին մի քանի կատակ է պատմում: Ի դեպ, վերջինը պետության ղեկավարին «դուր չի գալիս»:

Տեսանյութի վերջում Ուրգանտը հայտարարում է, որ ընթացքի ժամանակ հեռուստակենտրոնի մոտ դուրս է ցատկելու: