Թրամփի թեկնածությունն առաջադրել են խաղաղության Նոբելյան մրցանակի

ԱՄՆ նախագահ Դոնալդ Թրամփի թեկնածությունն առաջադրել են խաղաղության Նոբելյան մրցանակի Իսրայելի եւ ԱՄԷ-ի միջեւ հարաբերությունների կարգավորման նրա նախաձեռնությունից հետո մի քանի շաբաթ անց, փոխանցում է Fox News-ը։ 

Այս առաջարկով է հանդես եկել Նորվեգիայի խորհրդարանի անդամ Քրիսթիան Թիբրինգ-Գյեդեն, որը բարձր է գնահատում աշխարհում հակամարտությունների լուծման Թրամփի ջանքերը։

Նոբելյան կոմիտեին հղած իր նամակում Թիբրինգ-Գյեդեն նշում է, որ Թրամփի վարչակազմն առանցքային դերակատարում ունի Իսրայելի եւ Արաբական Միացյալ Էմիրությունների միջեւ հարաբերությունների ստեղծման գործում։

«Քանի որ ակնկալվում է, որ Մերձավոր Արեւելքի մյուս երկրները կհետեւեն ԱՄԷ-ի օրինակին, այդ համաձայնագիրը կարող է դառնալ այն շրջադարձային պահը, որի շնորհիվ Մերձավոր Արեւելքը կվերածվի համագործակցության եւ բարգավաճման տարածաշրջանի»,- շեշտվում է նորվեգացի խորհրդարանականի նամակում: