Վարորդներից մեկը դեպքի վայրից դիմել է փախուստի, մյուսը անգիտակից վիճակում տեղափոխվել է հիվանդանոց

Հոկտեմբերի 18-ին, ժամը 21.10-ի սահմաններում, Երեւան-Արմավիր ճանապարհի 17-րդ կմ-ի հատվածում իրար են բախվել 39-ամյա Արտակ Ի.-ի վարած «Նիսսան Տիանա» եւ 61-ամյա Մովսես Ա.-ի վարած «Ռենո Լոգան» մակնիշի ավտոմեքենաները:

Ոստիկանության մամուլի ծառայությունից  հայտնում են, որ վթարի հետեւանքով «Ռենո Լոգան»-ը բախվել է ճանապարհի աջ մասում գտնվող կիսակառույց շինության պատին, իսկ Արտակ Ի.-ն «Նիսսան Տիանա»-ով դեպքի վայրից դիմել է փախուստի:

Մովսես Ա.-ն մարմնական վնասվածքներով անգիտակից վիճակում տեղափոխվել է Վաղարշապատի բժշկական կենտրոն:

Ոստիկանների ձեռնարկած միջոցառումների արդյունքում՝ ժամը 23.30-ի սահմաններում Արտակ Ի.-ն իր տանը հայտնաբերվել եւ բերման է ենթարկվել ոստիկանության Վաղարշապատի բաժին, իսկ «Նիսսան Տիանա»-ն տեղափոխվել է բաժնի տուգանային հրապարակ:

Կատարվում է հետաքննություն: