Հայտնի է կորոնավիրուսը բուժող պատրաստուկ «Արեպլիվիրի» արժեքը
ՄԻՋԱԶԳԱՅԻՆ
Նոր կորոնավիրուսային համաճարակի բուժմանն ուղղված պատրաստուկ (պրեպարատ) «Արեպլիվիրի» համար առաջարկված արժեքը կազմել է 12 320 ռուբլի: Այս մասին РИА Новости-ին հաղորդել է «Պրոպոմեդ» դեղագործական ընկերության գլխավոր տնօրեն Անդրեյ Մլադենցևը:
«Այս գինն այս կամ այն կերպով կապված է բժշկական հաստատության մատակարարման արժեքի հետ: Մենք չենք կարող բյուջեի և մանրածախ առևտրի համար երկու տարբեր արժեք ունենալ, ուստի սա այն գինն է, որը փաստացի կերպով ձևավորվել է», - բացատրել է Մլադենցևը:
Պատրաստուկը ստեղծվել է ֆավիպիրավիրի հիման վրա: Հունիսի վերջում այն արժանացել է առողջապահության նախարարության հավանությանը, սակայն դեռևս օգտագործվել է միայն հիվանդանոցային պայմաններում:
«Պրոպոմեդի» մասնագետները մշակել են ամբողջական ցիկլի արտադրության սեփական տեխնոլոգիա: «Արեպլիվիրը» երկուշաբթի օրվանից կհայտնվի մայրաքաղաքի դեղատներում:
Նախօրեին ֆավիպիրավիրի վրա հիմնված մեկ այլ դեղ է վաճառքի հանվել՝ «Ռ-Ֆարմ» ընկերության «Կորոնավիրը»:
Նյութը հրապարակման պատրաստեց Լիլիթ Ամիրաղյանը
