Մեր հայրենակիցներին խորհուրդ եմ տալիս տուրք չտալ ադրբեջանական քարոզչությանը
ՔԱՂԱՔԱԿԱՆՈՒԹՅՈՒՆ1or.am կայքի զրուցակիցը քաղաքագետ Գագիկ Համբարյանն է։
— Պարոն Համբարյան, վերջին օրերին քննարկվում է ռուս խաղաղապահներ տեղակայելու թեման, որին անդրադարձել է նաև Պեսկովը: Ինչպես եք գնահատում այդ հայտարարությունները, ինչու են դրանք շրջանառվում՝ հաշվի առնելով, որ Հայաստանը հստակ արտահայտել է իր դիրքորոշումը դրա վերաբերյալ:
— Այս պահին մենք ավելի կարևոր խնդիր ունենք, այս պատերազմում ստատուս քվոի վերականգնում, իսկ դրանից հետո նոր ավելի շատ տարածքների ազատագրում ահաբեկրական Ադրբեջանից և դրանից հետո միայն խոսքը կարող է գնալ նոր բանակցությունների մասին։ Այս պահին անհրաժեշտ չէ անդրադառնալ ռուս խաղաղապահների թեմային, քանի որ իրավիճակը շատ անկանխատեսելի է և այդ մասին կարող ենք խոսել միայն այն ժամանակ երբ մենք լավ առաջխաղացում ունենանք և բանակցությունների ընթացքում հանդես գանք ուժեղ կողմ։
—Վերջին երկու օրերին հատկապես ադրբեջանական կողմից անդադար ապատեղեկատվություններ են հնչում մեր դիրքերի և տարածքների գրավման մասին։ Սակայն իրականում մեր կողմից խոսվում են տարբեր առաջխաղացումների մասին։ Ի՞նչ կասեք այս մասին։
— Այսօր պատերազմը ընթանում է բոլոր ոլորտներում, նաև՝ տեղեկատվական և մենք տուրք պետք է չտանք թուրք-ադրբեջանական տանդեմից տարածվող տեղեկություններին։ Նույն ապրիլյան քառօրյա պատերզմի ժամանակ էլ ադրբեջանցիները նշում էին, որ ինչ որ տարածքներ են ազատագրել, գյուղեր կամ շրջաններ են ազատագրել, և վերջում պարզ դարձավ, որ խոսքը ընդհամերը 800 հեկտար, նույնիսկ խոսվում է 400 հեկտար տարածք է, որի վրա որևէ գյուղ չի եղել։ Այնպես որ մեր հայրենակիցներին խորհուրդ եմ տալիս տուրք չտալ ադրբեջանական քարոզչությանը, չհավատալ և չտարածել այդ ապատեղեկատվությունը և հետևել ու հղումներ տալ միայն մեր և Արցախի պաշտպանության նախարարության և մամուլի խոսնակների կողմից տարածվող տեղեկատվությանը։ Ինչ վերաբերում է առաջխաղացմանը, ապա կարող եմ ասել, որ այդ ամենը խաբուսիկ է, քանի որ դեռևս ընթանում են մարտական գործողություններ և եթե առաջխաղացում ունենք ապա հնարավոր է որ ընթացող գործողությունների արդյունքում մի տեղ հետ նահանջենք, կամ նոր առաջխաղացումներ ունենանք։ Եվ ասել, որ մենք շատ լուրջ առաջխաղացում ունենք և կարող ենք բանակցություններ սկսել, ապա դա մի փոքր տարօրինակ է, որովհետև ադրբեջանաթուրքական տանդեմը դեռևս մտադիր չէ կանգ առնել և հաշվի առնելով դա մենք այս պահին բանակցությունների մասին խոսել չենք կարող։
Սոնա Գիշյան