Ադրբեջանը պատասխան կտա իր կողմից թույլ տված կոպտագույն սխալների համար. Ժաննա Ալեքսանյան
ՔԱՂԱՔԱԿԱՆՈՒԹՅՈՒՆ«Լրագրողներ հանուն մարդու իրավունքների» ՀԿ նախագահ Ժաննա Ալեքսանյանը 1or.am-ի հետ զրույցում նշեց, որ քանի դեռ պատերազմական թեժ մարտերը չեն դադարել, դժվար է համապարփակ գնահատական տալ, թե իրականում ինչ չափով են խախտվել մարդկանց իրավունքները, բայց որ Ադրբեջանը կոպտագույն ձևով որտանահարել է մարդկանց բոլոր իրավունքները, անզեն աչքով է տեսանելի:
«Այս պահին դեռ ամբողջական պատկեր չկա, թե միջազգային հանրությունը և մարդու իրավունքների իրավապաշտպան կազմակերպությունները այս ամենին ինչպես կարձագանքեն: Հայտնի է, որ միայն մեկ կազմակերպություն է հրապարակել Ադրբեջանի կողմից արգելված կասետային ռումբերով Ստեփանակերտին հարված հասցնելու մասին, ինչը անթույլատրելի է: Հայկական կողմը բազմիցս հայտարարել է Ադրբեջանի սանձազերծած պատերազմում Թուրքիայի մասնակցության, վարձկանների ներգրավման, հայկական կողմի հումանիտար օբյեկտները հրետակոծելու և այլ հարցերի մասին, որոնք ևս շատ հարցեր են բարձրացնում, բայց այս ամենով հանդերձ, միջազգային կառույցների կողմից մենք դեռ չենք տեսնում այն գնահատականը, որը կարելի էր սպասել: Բայց, կարծում եմ, այն չի ուշանա, իսկ Ադրբեջանը պատասխան կտա իր կողմից թույլ տված կոպտագույն սխալների համար»,- ասաց Ժ. Ալեքսանյանը:
Իրավապաշտպանի դիտարկմամբ՝ ի տարբերություն Ադրբեջանի մարդատյաց քաղաքականությանը, հայկական կողմը հարվածներ հասցնելուց առաջ հայտարարություն է տարածում, հնարավորություն տալով, որ մարդիկ լքեն տարածքները, քանի որ պատերազմները ևս ունեն իրենց օրենքները, որը սակայն Ադրբեջանը անտեսում է:
«Ես վստահ եմ, որ Եվրոխորհուրդը չի խուսափի իրավիճակի մասին հստակ գնահատականներ տալուց, պարզապես, կարծում եմ, որ փաստերի են սպասում: Շատ շուտով պարզ կդառնա, որ այս ընթացքում Ադրբեջանը մշտապես ստել է և ստով է կերակրել բոլորին: Իրավապաշտպան կազմակերպությունները փաստերը հրապարակում են միայն ստուգելուց հետ, և կարծում եմ Ադրբեջանի բոլոր քայլերը, այդ թվում դիակները մարտի դաշտում թողնելը խոսում է այն մասին, որ նրանց համար մարդը որևէ արժեք չի ներկայացնում»,- ասաց Ժ. Ալեքսանյանը:
Արմինե Գրիգորյան