Ողբերգական դեպք Տավուշի մարզում. այրվող տանը հրշեջները հայտնաբերել են հաշմանդամ տղամարդու դի

Այսօր՝ հոկտեմբերի 27-ին, ողբերգական դեպք է տեղի ունեցել Տավուշի մարզում։ Վաղ առավոտյան Արտակարգ իրավիճակների նախարարության փրկարար ծառայության Տավուշի մարզային փրկարարական վարչության ճգնաժամային կենտրոն ահազանգ է ստացվել, որ հրդեհ է բռնկվել Պտղավան գյուղի տներից մեկում։

Ինչպես հայտնում է ֆոտոլրագրող Գագիկ Շամշյանը, նշված գյուղ են ժամանել Նոյեմբերյանի հրշեջ-փրկարարական ջոկատը՝ 2 մարտական հաշվարկով։

Հրշեջները կրակը մարելուց հետո այնտեղ հայտնաբերել են տանտիրոջ՝ Էդգար Արզումանյանի կիսամոխրացած դին։

Տեղում աշխատում են նաև ոստիկանության Նոյեմբերյանի բաժնի օպերատիվ խումբը։ Դեպքի մասին տեղեկությունը փոխանցվել է Հայաստանի քննչական կոմիտեի Տավուշի մարզային քննչական վարչություն, որտեղից վարչության պետ Աննա Մանթաշյանի կարգադրությամբ դեպքի վայր են ժամանում քննիչները։ Ժամանում է նաև ոստիկանության փորձաքրեագետը։

Գ. Շամշյանի տեղեկություններով՝ մահացածը ունեցել է առողջական խնդիրներ և հաշմանդամ էր։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Լուսանկարը՝ Գագիկ Շամշյանի