ՀԱՊԿ-ը լուրջ մտահոգություն է հայտնում միջադեպի կապակցությամբ, որի հետեւանքով ռուսական ուղղաթիռ է խոցվել

ՀԱՊԿ-ը լուրջ մտահոգություն է հայտնում Հայաստանում տեղի ունեցած ողբերգական միջադեպի կապակցությամբ, որի հետեւանքով ռուսական ուղղաթիռ է խոցվել, «ՌԻԱ Նովոստի»-ին հայտնել է կազմակերպության մամուլի քարտուղար Վլադիմիր Զայնետդինովը:

«Մենք շատ ենք ցավում, որ հակամարտության սրումը [Ղարաբաղում] հանգեցրեց այդպիսի տխուր հետեւանքների: Լուրջ մտահոգություն ենք հայտնում կատարվածի կապակցությամբ, ցավակցում ենք զոհված անձնակազմի հարազատներին եւ մտերիմներին: Կսպասենք հետաքննության արդյունքներին, որտեղից է արձակվել կրակոցը»,- ասել է Զայնետդինովը:

Նա հիշեցրել է, որ ՀԱՊԿ-ը բազմիցս հակամարտող կողմերին հրադադարի կոչ է արել:

Ավելի վաղ ռուսական Մի-24 ուղղաթիռը ՀԶՀՀ-ից խոցվել էր Հայաստանի օդային տարածքում՝ Ադրբեջանի սահմանի մոտ: Մի-24-ն ընկել է Հայաստանի լեռնային շրջանում, անձնակազմի երկու անդամներ զոհվել են: Բաքուն խոստովանել է, որ ուղղաթիռը «սխալմամբ» է խոցել։