Ոչ մի երկիր մեղավոր չէ՝ մեզանից բացի. Գարիկ Քեռյան
ՔԱՂԱՔԱԿԱՆՈՒԹՅՈՒՆԵռակողմ համաձայնագրի ստորագրման փաստն իրականում սառը ցնցուղ էր բոլորի համար, բայց քաղաքագիտության դոկտոր Գարիկ Քեռյանը համեմատություններ անելով 1994թ. Արցախի ազատարգչական պայքարի հետ, 1or.am-ի հետ զրույցում նշեց, որ Ադրբեջանի հետ հակամարտության մեջ Հայաստանը հաղթանակ տարավ և ստիպեց հակառակորդին զինադադար կնքել:
«26 տարի անց՝ 2020թ. հայկական կողմը պարտվեց և ստիպված ընդունեց իրեն պարտադրված պայմանները։ Սա է իրականությունը, թե ինչ կլինի հետագայում, չենք կարող գուշակել, աշխարհը և մեր շրջապատը շատ արագ է փոխվում։ Այո, պարտվել ենք, բայց պարտությունը դեռ վերջը չէ։ Շատ ավելի ծանր ու կործանարար պարտություններ կրած ազգեր կան, որ այսօր տիրում են աշխարհին։ 20-րդ դարում երկու անգամ կապիտուլացված գերմանացիները, կորցրեցին իրենց հայրենիքի մոտ 40%-ը, բայց այսօր տիրում ու թելադրում են աշխարհին։ Միջուկային ռմբակոծության ենթարկված, միլիոնավո զոհերով ու տարածքային կորուստներ կրած Ճապոնիան այսօր համաշխարհային ուժային կենտրոն է։ Սերբիան ջախջախվեց, կորցրեց Կոսովոն և այլ պատմական տարածքներ, բայց այսօր կրկին ոտքի է կանգնել և ազդեցիկ է Բալկաններում։ Այն որ պարտվել ենք, ոչ մի երկիր մեղավոր չէ մեզանից բացի»,- ասաց Գ. Քեռյանը։
Քաղաքագետի կարծիքով՝ շատ խելք պետք չէր, հասկանալու համար, որ հզոր ռազմական թուրքական մեքենայի դեմ Հայաստանն ի սկզբանե դիմադրելու երկար հնարավորություն չի ունենալու։
«Այս ամենի հետ մեկտեղ ես հավատում եմ, որ օգտագործելով խաղաղությունը մենք կարողանալու ենք հզորանալ, քանի որ ապագան դեռ առջևում է: Իմ կարծիքով ոչ թե պետք է հուսահատվել, այլ հարկավոր է հետևություններ անել»,- ասաց Գ. Քեռյանը։
Արմինե Գրիգորյան