Մակրոնը հեռախոսազրույց է ունեցել Փաշինյանի հետ

Ֆրանսիայի նախագահ Էմանուել Մակրոնը նոյեմբերի 12-ին հեռախոսազրույց է ունեցել ՀՀ վարչապետ Նիկոլ Փաշինյանի հետ, հաղորդում է Ֆրանսիայի նախագահի պաշտոնական կայքը:

Մակրոնը պատրաստակամություն է հայտնել նպաստելու Լեռնային Ղարաբաղում ստեղծված իրավիճակի` հակամարտության բոլոր կողմեր համար ընդունելի երկարաժամկետ և արդար կարգավորման հասնելուն:

Մակրոնը գոհունակություն է հայտնել ռազմական գործողությունների դադարեցման առնչությամբ, հիշեցրել Հայաստանի և հայ ժողովրդի հետ իր ունեցած բարեկամության մասին:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն:

Ռուս խաղաղապահների մի մասն արդեն Արցախում է։ Նոյեմբերի 11-ին ՀՀ պաշտպանության նախարար Դավիթ Տոնոյանն ընդունել է Լեռնային Ղարաբաղի հակամարտության գոտում հրադադարի ռեժիմի վերահսկման նպատակով ժամանած ՌԴ խաղաղապահ զորակազմի հրամանատար, գեներալ-լեյտենանտ Ռուստամ Մուրադովին:

Հանդիպմանը քննարկվել են խաղաղապահ առաքելության կազմակերպման և իրականացման հարցեր։