Վերքերը շատ մեծ են ու խորը, որոնք չեզոքացնելը հեշտ չի լինելու. Արմեն Վարդանյան
ՔԱՂԱՔԱԿԱՆՈՒԹՅՈՒՆՔաղաքագետ Արմեն Վարդանյանը համոզված է, որ Հատաստանում ստեղծված իրավիճակը իշխանությունների լեգիտիմության ճգնաժամի մասին է խոսում, իսկ պատերազմը պարտված ցանկացած երկրի կառավարություն չի կարող շարունակել մնալ երկրի կառավարման ղեկին: Եվ այն բողոքի ցույցերն ու դրսևորումները, որոնք կան, խոսում է այդ մասին:
«Ուշագրավ է, որ վարչապետն ինքն է ասում, որ ամեն ինչի պատասխանատուն ինքն է, բայց իր հրաժարականի փոխարեն կաբինետում է փոփոխություններ իրականացնում: Զարմանալի է, օրինակ, թե ինչու են այնպիսի նախարարներ հեռացվում, որոնք կապ չունեն պատերազմի հետևանքների հետ: Օրինակ՝ ԿԳՄՍ նախարարը: Ու թեև կառավարության ղեկավարը փորձում է որոշ քայլեր իրականացնել, բայց, միևնույն է, չի կարողանալու հասարակության ընդվզումները չեզոքացնել, քանի որ վերքերը շատ մեծ են ու խորը և այն չեզոքացնելը հեշտ չի լինելու»,- 1or.am-ի հետ զրույցում ասաց Ա. Վարդանյանը:
Նման կոսմետիկ փոփոխությունները ևս որևէ արդյունքի չեն բերելու, համոզված է քաղաքագետը: Նրա կարծիքով՝ ավելի ողջաամիտ կլիներ, եթե վարչապետը հստակ հայտարարեր առաջիկայում սպասվելիք արտահերթ ընտրությունների մասին:
«Եթե վարչապետը հստակ նշի, թե երբ են արտահերթ խորհրդարանական ընտրություններ տեղի ունենալու, մարդիկ կհանգստանան: Առավել ևս, որ իշխող քաղաքական ուժը մշտապես հայտարարել է, որ կառչած չէ աթոռին և երբ ժողովուրդը ցանկանա՝ իրենք պատրաստ են հեռանալ իշխանությունից: Ի վերջո, պետք է ընդունել, որ ոչ մի իշխանություն հավերժ չէ, ուստի եթե անգամ արտահերթ ընտրությունների ժամանակ ներկայիս իշխող կուսակցությունը չկարողանա շարունակել պաշտոնավարել, ապա կարող է դառնալ լավ ընդդիմություն»,- ասաց Ա. Վարդանյանը:
Արմինե Բաբայան