Թուրքիան փորձում է ճնշում գործադրել Ռուսաստանի վրա. Արմեն Պետրոսյան
ՔԱՂԱՔԱԿԱՆՈՒԹՅՈՒՆԲաքուն և Անկարան սկսել են ակնհայտ սարդրիչ գործողություններ իրականացնել, չթաքցնելով, որ դեմ են ռուսական խաղաղապահների ներկայությանը Արցախաադրբեջանական սահմանին:
Արևելագետ Արմեն Պետրոսյանը 1or.am-ի հետ զրուցում անդրադառնալով վերջին շրջանում Անկարայից և Բաքվից հրահրվող հակառուսական հայտարարություններին, նշեց, որ նման քայլերը կանխատեսելի էին, քանի որ թուրք-ադրբեջանական տանդեմի համար ամենևին էլ ցանկալի չէր, որ ռուսական ուժերն ամրակայվեն Արցախում:
«Ակնհայտ է, որ Թուրքիան այլ խաղադրույք էր կատարել այս պատերազմում, սակայն փաստացի ստիպված է սահմանափակվել լոկ դիտորդի կարգավիճակ ունենալով, այն էլ բավականին սահմանափակ օրակարգով: Ուստի պարզ է, որ Թուրքիան ամեն ինչ անելու է իր դիրքերն ընդլայնելու համար:
Մյուս կողմից Թուրքիան շարունակելու է ձգտել իր դիրքերն ամրապնդել Ադրբեջանում: Ի դեպ, արդեն իսկ ուրվագծվում է նոր բախման սցենար՝ Ուկրաինայում, որը կրկին տեղավորվում է ռուս-թուրքական հարաբերությունների սրման համատեքստում»,- ասաց Ա. Պետրոսյանը:
Քաղաքագետի կարծիքով՝ ակնհայտ է, որ Թուրքիան փորձում է ամեն կերպ մեծացնել ճնշումը Ռուսաստանի նկատմամբ: Ու թեև երկու երկրների միջև հարաբերությունները արտաքուստ գնահատվում է շատ ջերմ, բարեկամական, բայց իրականությունը բոլորովին այլ է:
«Թուրքիայի գործողությունները պետք է դիտարկել այլ համատեքստում: Մասնավորապես սերտացնելով կապերը Ուկրաինայի հետ, Էրդողանը փաստացի ապահովագրում է իրեն Արևմուտք հետ հետագա հարաբերությունների առումով: Դրանով նա հույս ունի մի կողմից ճնշում գործադրել Ռուսաստանի վրա, մյուս կողմից՝ զսպել Արևմուտքի կողմից Թուրքիայի դեմ պատժամիջոցների կիրառումը»,- ասաց Ա. Պետրոսյանը:
Արմինե Գրիգորյան