Օնիկ Գասպարյանը, իրավիճակը հակասահմանադրական գնահատելով, պարտավոր էր շարունակել իր լիազորությունների կատարումը. սահմանադրագետ
ՔԱՂԱՔԱԿԱՆՈՒԹՅՈՒՆՍտեղծված ճգնաժամային իրավիճակում ՀՀ նախագահ Արմեն Սարգսյանը ձեռնպահ մնաց իր լիազորության կատարումից: Իմ գնահատմամբ՝ վարչապետին, խորհրդարանական խմբակցությունների ղեկավարներին, «Հայրենիքի փրկության շարժման» ղեկավարներին հանդիպման հրավիրելով՝ նա փորձում է մի փոքր հարթեցնել սուր անկյունները, ամեն դեպքում դա ձևական բնույթ ունի: Այս մասին Բաղրամյան պողոտայում Tert.am-ի հետ զրույցում ասաց սահմանադրագետ Գոհար Մելոյանը:
«Չեմ կարծում, որ արժի, որ Նիկոլ Փաշինյանն չաջակցող ուժերն ընդհանրապես ընդունեն իր հրավերը, քննարկումներ անեն»,-նշեց նա:
Մելոյանը վերահաստատեց՝ ո՛չ նախագահը, ո՛չ վարչապետը չունեին իրավունք՝ դադարեցնելու ԳՇ պետի լիազորությունները:
«Այս առումով մի քիչ հիասթափեցնող էր Օնիկ Գասպարյանի հայտարարությունը, քանի որ նա գնահատանք է տալիս, որ այս գործընթացը հակասահմանադրական է, սակայն նշում է, որ դիմելու է Վարչական դատարան և որպես ԳՇ պետ՝ իր լիազորությունները չի իրականացնելու: Նա, իրավիճակը հակասահմանադրական գնահատելով, պարտավոր էր շարունակել իր լիազորությունների կատարումը»,-ասաց սահմանադրագետը:
Նա ընդգծեց՝ Սահմանադրությունը ԳՇ պետին տալիս է հատուկ կարգավիճակ՝ դրանով վերացնելով նրան պաշտոնից հեռացնելու հնարավորությունը:
«Հնարավոր է՝ դատարանը հայցի ապահովում կիրառի և կասեցնի այս ամբողջ իրավիճակը, և շարունակվի Օնիկ Գասպարյանի պաշտոնավարումը: Կարծում եմ՝ դրանով է պայմանավորված Նիկոլ Փաշինյանի՝ րոպե առաջ նոր ԳՇ պետ նշանակելու շտապողականությունը»,-ասաց նա:
Ըստ Մելոյանի՝ արդեն պետք է մի շարք քրեական գործեր հարուցված լինեին, քանի որ Նիկոլ Փաշինյանը, սահմանադրագետի դիտարկմամբ, արդեն երեք անգամ տապալել է սահմանադրական կարգը՝ ստորագրելով միջազգային պայմանագրեր, որոնց համար Սահմանադրությունը ենթադրում էր վավերացման գործընթաց:
«Լիահույս չենք կարող լինել, որ կապիտուլյանտ ղեկավարը կսթափվի և կլքի իր պաշտոնը, որովհետև սահուն քայլերով մեզ տանում է անդունդը, մենք պետականության կորստի եզրին ենք: Իմ միակ հույսը իրավապահ մարմիններն են, որ ի վերջո կգան այն գիտակցմանը, որ ամսական պարգևավճարները ոչինչ չարժեն հայրենիքի կորստի դիմաց»,-ասաց Գոհար Մելոյանը: