Արցախի ՄԻՊ–ն ու Հայաստանի ՄԻԵԴ ներկայացուցիչը քննարկել են գերիների հարցը

ՄԻԵԴ–ում ՀՀ կառավարության ներկայացուցիչ Եղիշե Կիրակոսյանն Արցախում հանդիպել է ԱՀ մարդու իրավունքների պաշտպանի ժամանակավոր պաշտոնակատար Արսեն Սառաջյանի հետ։

Ինչպես հայտնում են ԱՀ ՄԻՊ գրասենյակից, հանդիպման ընթացքում քննարկվել են Ադրբեջանում պահվող հայ ռազմագերիների և քաղաքացիական գերեվարված անձանց իրավունքների պաշտպանության և նրանց հայրենիք վերադարձնելու ուղիները:

Հատուկ ուշադրություն է դարձվել քաղաքացիական զոհերի հարազատների և վիրավորվածների իրավունքների, ինչպես նաև տեղահանված անձանց գույքային իրավունքների պաշտպանության ուղղությամբ իրականացվող աշխատանքներին:

Քննարկվել է նաև Արցախի դեմ սանձազերծված պատերազմի ընթացքում և դրանից հետո Արցախի ժողովրդի իրավունքների խախտումների մասին միջազգային հարթակներում ու մասնավորապես Մարդու իրավունքների եվրոպական դատարանում բարձրաձայնելու հարցը: