Երեսուն տարի մենք կերակրվել ենք խոստումներով, այժմ պետք են ծրագրեր
ՔԱՂԱՔԱԿԱՆՈՒԹՅՈՒՆՄինչ Երևանի ընդհանուր իրավասության դատարանում կմեկնարկեր ՀՀ երրորդ նախագահ Սերժ Սարգսյանի և մյուսների գործով դատական նիստը՝ Սերժ Սարգսյանը մոտեցավ իր կողմնակիցներին և հայտարարեց, որ երբեք չի լքելու քաղաքական խրամատը։ Մինչ այդ էլ նա հայտարարել էր, որ չի հավակնում բարձր պաշտոն զբաղեցնել։ Այս թեմայով 1or.am կայքը զրուցել է քաղաքագետ Ալեքսանդր Մանասյանի հետ։
—Պարոն Մանասյան, ի՞նչ եք կարծում Սերժ Սարգսյանը կմասնակցի ընտրություններին։
— Դա իր գործն է, բայց այդ երկու հայտարարությունները համատեղելի են, քանի որ նա կարող է չլքել քաղաքական խրամատը և կարող է չմասնակցել ընտրություններին։
—Ըստ ձեզ, ընտրությունների անցկացման լավագույն ժամկետը ե՞րբ պետք էր լիներ։ Եվ արտահերթ ընտրություններով արդյոք կարող ենք որակապես այլ խորհրդարան ունենանլ։
— Դա կախված է նրանից, թե կուսակցությունները քաղաքական ինչ ծրագրեր կունենան և ոչ թե ով ինչքան ծանոթ կբերի։ Ծրագրեր են պետք և մենք պետք է փորձենք այս ճգնաժամը օգտագործել որպես քաղաքական հասունացման պատմական պահ։ Մենք պետք է ընտրությունների գնանք ոչ թե իրար փնովելով և անձանց քննադատելով, այլ պետք է գնանք նախագծեր առաջադրելով կամ նախագծեր քննադատելով։ Դրանից շատ բան է կախված, այս ամիսներին, այս երկու տարվա ընթացքում մեր քաղաքական խոսույթը իջել է մինչև փողոցային հայհոյանքների մակարդակ և ժամանակն է, որ մենք լուրջ խոսենք քաղաքական ծրագրերից։
—Ի վերջո, այս ընտրությունները ստեղծված ճգնաժամից ելք կարո՞ղ են լինել, թե ոչ։
— Ելք կլինի, եթե մենք նախագիծ պահանջենք քաղաքական ուժերից, այլ ոչ թե առաջնորդվենք մերժիր սրան, նրան կամ չորրորդին, կեցցե այս ուժը կամ մյուսը։ Պետք է հստակ նախագիծ լինի և միայն դա կարող է օգնել դուրս գալ ստեղծված ճգնաժամից։
—Վերջերս «Երրորդ ուժ» քաղաքացիական նախաձեռնություն ստեղծեց «Թովմասյան հիմնադրամի» ղեկավար Արտակ Թովմասյանը։ Այդ նախաձեռնության անդամները քաղաքականությամբ չզբաղված և տարբեր ոլորտներում հաջողություն գրանցած անձիք են։ Ինչ կարծիք ունեք այս ուժի մասին։
— Չեմ կարող որևէ բան ասել, քանի որ ծանոթ չեմ նրանց ծրագրին և կարող եմ միայն հարցնել ի՞նչ նախագիծ ունեն, ի՞նչ են առաջարկում, ինչո՞ւ են ուզում գալ իշխանության և այս դեպքում ոչ թե պետք է լինեն խոստումներ, որի միջոցով սովորաբար մեզ մոտ իշխանության են եկե,լ այլ պետք է լինեն հստակ և հիմնավոր ծրագրեր մեր ժամանակների գլոբալ գործընթացների իմաստավորման և աշխարհաքաղաքական իրադրության վերլուծության հիման վրա պետք է նախագծերը առաջադրվեն և խոսքը ոչ միայն այդ նոր ուժի մասին է, այլ առհասարակ բոլոր ուժերի ովքեր հավակնում են մասնակցել ընտրություններին։
Սոնա Գիշյան