Շարմազանովը արտահերթ ընտրությունների մասին

Կոչ եմ անում քաղաքական ուժերին շարունակել պահանջել Փաշինյանի հրաժարականը, այս օրակարգը չպետք է փոխվի: Այս մասին այսօր՝ մարտի 22-ին, լրագրողների հետ հանդիպման ժամանակ ասաց Հանրապետական ​​կուսակցության մամուլի խոսնակ Էդուարդ Շարմազանովը: Նրա խոսքով՝ հենց Փաշինյանն է սանձազերծել պատերազմն իր անպատասխանատու հայտարարություններով, իսկ նրանք, ովքեր ասում են, որ մեղավոր է եւ՛ ներկա, եւ՛ նախկին իշխանությունը, ջուր են լցնում Փաշինյանի ջրաղացին: «Ինչպե՞ս է անցկացվելու նախընտրական արշավը: Դիպուկահարների թիրախի տա՞կ, որպեսզի եթե ինչ-որ մեկը պահանջի նրա հրաժարականը, դիպուկահարը կրակի՞ այդ մարդուն»,-հարց ուղղեց նա:

Շարմազանովի գնահատմամբ՝ Փաշինյանը պետք է պատասխանատվության ենթարկվի, բայց ամեն ինչ պետք է տեղի ունենա օրենքի շրջանակում: «Մենք դեմ ենք անօրինական գործողություններին: Մեր օրակարգն ակնհայտ է, այն է՝ Նիկոլի հրաժարականը, եւ մենք կպայքարենք մինչեւ վերջ, նույնիսկ եթե մենակ մնանք: Փաշինյանը մեզ կենդանի է պետք, որպեսզի պատմի՝ ինչպես եւ ինչու արեց այս ամենը: Բայց եթե ընտրություններն անցկացվեն մեզնից անկախ, ապա մենք քննարկում կանցկացնենք»,-նշեց նա:

ՀՀԿ մամուլի խոսնակը համոզմունք հայտնեց, որ ընտրությունները կեղծվելու են Փաշինյանի օրոք: «Սա փորձ կլինի հասարակությունը տանել քաղաքացիական բախումների: Սա թուրքական պատվեր է: Ընդդիմությունն ամեն ինչ արեց, որ դրան չհամաձայնվի եւ քննադատվեց: Փաշինյանը տրոյական ձի է հայկական պետականության համար»,-շեշտեց Շարմազանովը: Նա չբացառեց, որ Հայրենիքի փրկության շարժումը կրկին հանդիպումներ կանցկացնի մարզերում: