«Իմ քայլը» նոր պատգամավոր ունի. նա երդմամբ ստանձնեց մանդատը

«Իմ քայլը» նոր պատգամավոր ունի. Ազգային ժողովի նախագահ Արարատ Միրզոյանն այսօր մեկնարկած հերթական քառօրյայի ժամանակ հայտնեց` Վահագն Թևոսյանին կփոխարինի Էմմա Պալյանը։

«ԿԸՀ-ն ներկայացրել է ԱԺ պատգամավոր ընտրված և լիազորությունները վաղաժամկետ դադարած պատգամավոր Վահագն Թևոսյանի մանդատը հաջորդ թեկնածուին տրամադրելու մասին արձանագրությունը: Մանդատը տրվում է «Իմ քայլից» Էմմա Պալյանին»,–ասաց Միրզոյանը։

Պալյանը երդվեց` ստանձնելով ԱԺ պատգամավորի մանդատը։

Հիշեցնենք, որ մարտի 9-ին «Իմ քայլը» խմբակցության պատգամավոր Վահագն Թևոսյանը հրաժարականի դիմում էր ներկայացրել։ Նա նշանակվել է Հանրային հեռարձակողի խորհրդի անդամ։

Էմմա Պալյանը ծնվել է 1990 թվականի նոյեմբերի 26-ին Գյումրիում: 1997թթ-ից մինչև 2007 թվականը սովորել է Գյումրու Միքայել Նալբանդյանի անվան թիվ 11 միջնակարգ դպրոցում: Այնուհետև սովորել է Գյումրու Մ. Նալբանդյանի անվան պետական մանկավարժական ինստիտուտի ժուռնալիստիկայի ֆակուլտետում:

2010-2012 թվականներին աշխատել է ԳԱԼԱ հեռուստաընկերությունում որպես լրագրող: 2013-2018թթ-ին աշխատել է araratnews.am լրատվական կայքում: Ամուսնացած է, ունի 2 աղջիկ: 2016 թվականից «Քաղաքացիական պայմանագիր» կուսակցության անդամ է: