Մինչ ընտրությունները ոստիկանների աշխատավարձը բարձրացնելու Կառավարության որոշումը ուղերձ է. «Բարգավաճ Հայաստան»
ՔԱՂԱՔԱԿԱՆՈՒԹՅՈՒՆ
Նախքան արտահերթ խորհրդարանական ընտրությունների սկսվելը ոստիկանների աշխատավարձը 100 տոկոսով բարձրացնելու Կառավարության որոշումը ուժայիններին հղված հատուկ ուղերձ է: Այս մասին մարտի 26-ին Ազգային ժողովում ավանդական ճեպազրույցների ժամանակ ասաց «Բարգավաճ Հայաստան» կուսակցության պատգամավոր Նաիրա Զոհրաբյանը:
Նրա խոսքով՝ այն ժամանակահատվածում, երբ ոստիկանները շուրջօրյա հետեւում էին ընդդիմադիրներին, ապահովում նրանց ցրումը, ակտիվիստների եւ ընդդիմադիր գործիչների նկատմամբ անհամաչափ ուժ էին կիրառում, նրանց պարգեւավճարներ են տրվել:
«Սա միանշանակ հստակ ուղերձ է: Երբ մենք տագնապահարույց տեղեկություններ ենք ստանում այն մասին, որ շտապօգնության աշխատակիցներին ուշացումով են վճարել, երբ տագնապահարույց ազդանշաններ ենք ստանում, որ որոշ հաստատություններում աշխատավարձերի հետ կապված որոշակի մտավախություններ կան, եւ այս ֆոնին մեր երկրում բարձրացնում են ոստիկանության աշխատակիցների աշխատավարձերը, սա, իմ կարծիքով, միանգամայն հստակ ուղերձ է, որ վարչապետ Նիկոլ Փաշինյանը փորձում է բարձրացնել հենց այն ինստիտուտների աշխատավարձերը, որոնք, ըստ էության, կարող են նրա անվտանգությունն ապահովել ընտրարշավի առումով»,- շեշտեց պատգամավորը:
