Ադրբեջանցիները ոչ միայն չեն կարող գրասենյակ ունենալ Ստեփանակերտում, այլ նույնիսկ այցելել մայրաքաղաք. թող մտածեն մեր տարածքների վերադարձի մասին. Լուսինե Ավանեսյան
ՔԱՂԱՔԱԿԱՆՈՒԹՅՈՒՆԱդրբեջանցիները կարող են Ստեփանակերտում գրասենյակի տեղ փնտրել միայն քարտեզի վրա, սակայն ոչ իրական կյանքում: Այս մասին հայտարարել է ԱՀ նախագահի մամուլի քարտուղար Լուսինե Ավանեսյանը՝ «Արցախպրես»-ին մեկնաբանություն տալով Թուրալ Գանջալիևի այն հայտարարության առթիվ, թե առաջիկայում Ստեփանակերտում իրենց համայնքի գրասենյակն են բացելու։
«Դա ադրբեջանական կողմի հերթական հիվանդագին ցանկությունն է, որը ներկայացնում են որպես իրականություն: Այսպիսի էժանագին տեղեկատվական սպեկուլյացիաներով նրանք նպատակ ունեն իրենց հասարակությանը պահելու մոլորության մեջ և նյարդայնացնելու հայ հասարակությանը: Նրանք չեն կարող ոչ միայն գրասենյակ ունենալ Ստեփանակերտում, այլ նույնիսկ այցելել Ստեփանակերտ: Դրա փոխարեն թող մտածեն մեր բռնազավթված տարածքների վերադարձի մասին, որպեսզի հնարավոր լինի խոսել հակամարտության կարգավորման իրական հեռանկարների վերաբերյալ»,- նշել է Լուսինե Ավանեսյանը: