Պեսկով. ՌԴ ու Թուրքիայի միջեւ հարաբերությունների խնդիրը կարող են լուծել միայն Անկարայի քայլերը

Ոչ մի աշխատախումբ չի կարող լուծել ՌԴ ու Թուրքիայի հարաբերություններում առկա խնդիրները, դա կարող է անել միայն Թուրքիայի ղեկավարությունը, որից Մոսկվայում ներողություն ու վնասի փոխհատուցում են ակնկալում խոցված ռուսական ռմբակոծիչի դիմաց: Այս մասին լրագրողներին ասել է նախագահի մամուլի քարտուղար Դմիտրի Պեսկովը, մեկնաբանելով Թուրքիայի ԱԳՆ ղեկավարի առաջարկը՝ Ռուսաստանի հետ աշխատանքային համատեղ խումբ ստեղծել երկու երկրների միջեւ հարաբերությունները կարգավորելու ուղիներ որոնելու համար, հայտնում է ՏԱՍՍ-ը:

«Ոչ մի աշխատախումբ այս խնդիրը լուծել չի կարող, ի վիճակի չէ: Դա կարող է անել միայն Թուրքիայի ղեկավարությունը, որից Մոսկվայում ակնկալում են այն գործողությունները, որոնց մասին խոսել է նախագահ Պուտինը Աթենքում»,- ասել է Կրեմլի ներկայացուցիչը:

Վլադիմիր Պուտինը մինչ ադ հայտնել էր, որ Մոսկվան Անկարայից ակնկալում է որոշակի քայլեր ու արձանագրել, որ առայժմ «մենք չենք լսել ներողություն ու վնասը փոխհատուցելու պատրաստակամություն»: