Վերլուծելու են սխալները. Ռոբերտ Քոչարյանի գլխավորած դաշինքը համագումար կանցկացնի

Ռոբերտ Քոչարյանի գլխավորած «Հայաստան» դաշինքն այսօր` հունիսի 29–ին, համագումար կանցկացնի: Այս մասին Sputnik Արմենիային հայտնել է աղբյուրը դաշինքի շտաբից։

Սա դաշինքի առաջին խոշոր միջոցառումն է խորհրդարանական ընտրություններից հետո, որի արդյունքներով այն զբաղեցրել է երկրորդ տեղը՝ ստանալով 29 մանդատ նոր գումարման Ազգային ժողովում։ Մեր տեղեկություններով՝ միջոցառմանը կմասնակցի 900 մարդ։

«Հրապարակ» օրաթերթն իր հերթին գրում է, որ դաշինքի ղեկավարությունը ցանկանում է շնորհակալություն հայտնել ակտիվիստներին և շտաբների ղեկավարներին ՝ ընտրությունների շրջանակներում կատարված աշխատանքի և ձեռք բերված արդյունքների համար:

Համագումարում ամփոփվելու են նաև արդյունքները, վերլուծվելու են սխալներն ու թերությունները։

Հիշեցնենք` Հայաստանում հունիսի 20-ին կայացել են արտահերթ խորհրդարանական ընտրություններ, որոնց մասնակցել է 25 քաղաքական ուժ 21 կուսակցություն և 4 դաշինք։

Ձայների վերջնահաշվարկի արդյունքում «Քաղաքացիական պայմանագիր» կուսակցությունը ստացել էր  658 761 ձայն կամ  ընտրողների ձայների 53.91%–ը, «Հայաստան» դաշինքը ստացել է  269 481 ձայն կամ 21.09%–ը, «Պատիվ ունեմ» դաշինքը  66 650 քվե կամ 5.22%։ Այս երեք ուժերը կձևավորեն ութերորդ  գումարման Ազգային ժողովը։ Ընտրություններին մասնակցությունը կազմել է 49.4 տոկոս։