Այս իշխանությունը Գորիս-Կապան միջպետական ճանապարհը, Կապան-Ճակատեն ճանապարհը մեր բոլորի թիկունքում առանձին հուշագրով ստորագրել և հանձնել է թշնամուն. Աննա Գրիգորյան

Երեկ զինված ադրբեջանցիները փակել են Գորիս-Կապան միջպետական ճանապարհը և շրջափակման մեջ են թողել մեր հայրենակիցներին: Այս մասին ԱԺ նիստի մեկնարկին վարման կարգով ելույթով հայտարարեց «Հայաստան» խմբակցության պատգամավոր Աննա Գրիգորյանը՝ նշելով, որ ռուս սահմանապահների միջնորդությամբ հնարավոր է եղել նրանց դուրս բերել շրջափակումից:

«Ուզում եմ հիշեցնել, որ այդ միջպետական ճանապարհը, ինչպես նաև Կապան-Ճակատեն ճանապարհը այս իշխանությունը մեր բոլորի թիկունքում առանձին հուշագրով ստորագրել և հանձնել է թշնամուն՝ ասելով, որ այդպես է ապահովելու Սյունիքի անվտանգությունը: Ի վերջո, կարողացա՞ք ապահովել Սյունիքի անվտանգությունը»,-ասաց նա՝ դիմելով իշխանությանը:

«Երկու օր է՝ խոսում եք խաղաղությունից. ի վերջո, հասկանու՞մ եք, որ այսպես խաղաղություն չեն կառուցում, պարտության կուսակցությունը չի կարող բերել արժանապատիվ խաղաղություն, այլ միայն նվաստացում»,-հայտարարեց պատգամավորը: