Իրանը թույլ չի տալու միջազգայնորեն ճանաչված սահմանների փոփոխություն
ՔԱՂԱՔԱԿԱՆՈՒԹՅՈՒՆ
ՀՀ ԱԳ նախարար Արարատ Միրզոյանը Իրանում հանդիպել է իր պաշտոնակցին՝ Հոսսեյն Ամիր Աբդոլլահիանին: Այցի շրջանակներում եղած համատեղ հայտարարության վերաբերյալ իրանագետը նկատեց՝ այն վկայում էր համատեղ հարաբերությունների զարգացման պատրաստակամության մասին:
Այս թեմայով զրուցել ենք իրանագետ Գարիկ Միսակյանի հետ։ Անդրադառնալով հանդիպմանը՝ իրանագետը ասել է․ «Իրանի արտգործնախարարի կողմից բավականին լավ շեշտադրումներ հնչեցին, երբ նշվեց, որ կա ցանկություն հայ-իրանական հարաբերությունները գրեթե բոլոր ոլորտներում զարգացնելու վերաբերյալ: Խոսվեց Հյուսիս-Հարավի, և հատկապես՝ Տաթևի ճանապարհահատվածում շինարարական աշխատանքներում Իրանի ներգրավվածության և այն բավականին կարճ ժամանակում ավարտելու վերաբերյալ։ Իրանի ԱԳՆ-ի կողմից բավականին հետաքրքիր ձևակերպում եղավ, երբ նա նշեց, որ հայտարարում է՝ թույլ չեն տալու միջազգայնորեն ճանաչված սահմանների փոփոխություն, ինչը նաև Հայաստանի շահերից է բխում»:
Անդրադառնալով տեղեկություններին, թե Հայաստանն Իրանին առաջարկ է արել Սյունիքում ավիաբազա հիմնել՝ Գարիկ Միսակյանը նշեց, որ դրանք հիմնականում սոցցանցային և ԶԼՄ-ների մակարդակում հայտարարություններ են:
Սոնա Գիշյան
