Մոսկվան և Թեհրանը պայմանավորվել են հանդիպում կազմակերպել Պուտինի և Ռայիսիի միջև

Մոսկվան և Թեհրանը պայմանավորվել են կազմակերպել Ռուսաստանի և Իրանի նախագահներ Վլադիմիր Պուտինի և Էբրահիմ Ռայիսիի հանդիպումը: «ՌԻԱ Նովոստի»-ի փոխանցմամբ՝ այս մասին լրագրողներին հայտնել է Իրանի ԱԳ նախարար Հոսեյն Ամիր-Աբդոլլահիանը՝ ռուս պաշտոնակցի հետ համատեղ ասուլիսում:

«Հուսով ենք, որ ոչ հեռավոր ապագայում մեր երկրների նախագահները կկարողանան հանդիպել մայրաքաղաքներից մեկում: Այդ հարցով մեր պայմանավորվածությունը վկայում է այն մասին, որ մեր հարաբերությունները ռազմավարական են և առաջնահերթ են մեր երկրների համար: Մենք Ռուսաստանին ընդունում ենք որպես ռազմավարական գործընկերոջ»,- ասել է իրանցի պաշտոնյան:

Վերջինս հավելել է, որ Ռուսաստանն առաջնահերթ տեղ է գրավում Իրանի արտաքին քաղաքականության մեջ: