Այդ սպառնալիքներով որևէ մեկին քաղաքական պայքարից չեն շեղելու, չի պակասելու վճռականությունը
ՔԱՂԱՔԱԿԱՆՈՒԹՅՈՒՆԱզգային ժողովում մեծամասնություն կազմող «Քաղաքացիական պայմանագիր» խմբակցությունը երեկ որոշում կայացրեց ԱԺ փոխնախագահ Իշխան Սաղաթելյանին և ԱԺ տնտեսական հարցերի մշտական հանձնաժողովի նախագահ Վահե Հակոբյանին պաշտոններից զրկելու գործընթաց սկսելու մասին:
Տեղեկությունը ֆեյսբուքյան իր էջում հայտնել է իշխող խմբակցության քարտուղար Արթուր Հովհաննիսյանը:
Ըստ ԱԺ ղեկավարության հաշվարկների՝ ամենաշատը բացակայած պատգամավորների տասնյակը գլխավորում է Արմեն Չարչյանը, որը 248 բացակա ունի, սակայն 34-ը՝ հարգելի։ Հաջորդը Գեղամ Մանուկյանն է՝ 225 բացակայությամբ:
1or.am-ը կապ հաստատեց Գեղամ Մանուկյանի հետ՝ իմանալու համար՝ արդյոք որևէ «նախազգուշացում» ստացե՞լ է իշխող կուսակցությունից.
«Ոչ, չեմ ստացել: Որոշելիքն իրենցն է, ամեն օր մի նոր բան են մտածում: Միայն մի բանում թող վստահ լինեն, որ այդ սպառնալիքներով որևէ մեկին քաղաքական պայքարից չեն շեղելու, չի պակասելու վճռականությունը»:
Մեր դիտարկմանը, թե իշխանությունների ցանկում մոտ 10 պատգամավորի անուն կա, ինչու են հենց Իշխան Սաղաթելյանին և Վահե Հակոբյանին վերցրել նշանառության տակ, Մանուկյանն արձագանքեց.
«Իրենց տրամաբանությունը ես չեմ կարող մեկնաբանել»:
Մարիամ Նալբանդյան