ՌԴ խաղաղապահներն առանց անվտանգության երաշխիքների հստակ ձևակերպման ուղղակի չեն կարող դուրս գալ ԼՂ-ից. Փաշինյան
ՔԱՂԱՔԱԿԱՆՈՒԹՅՈՒՆՍոչիի հայտարարության մեջ խաղաղապահների մասին հիշատակում կա, բայց մշուշոտ, ինչպիսի՞ն է կողմերի տրամադրությունը, Բաքվի ու Ռուսաստանի մոտ ցանկություն կա՞ խաղաղապահների առաքելությունը երկարաձգելու և քանակն ավելացնելու: ՀՀ վարչապետ Նիկոլ Փաշինյանը, Հանրային հեռուստաընկերությանը տված հարցազրույցում պատասխանելով այս հարցին, ասաց հետևյալը.
«Ես հրապարակային խոստացել եմ, ՌԴ նախագահի հետ հանդիպման մեկնարկին, նաև եռակողմ ֆորմատով ասել եմ, որ ես հիմա պատրաստ եմ ստորագրել թուղթը` խաղաղապահների ժամկետի ավտոմատ երկարաձգման, այսինքն` մանդատի մասին, ես պատրաստ եմ դա անել, բայց այստեղ էլ փոխըմբռնում չի եղել: Իմ կարծիքով` խաղաղապահների թեման էլ կարևոր է: Ուզում եմ ընդգծել՝ Ադրբեջանի նախագահի նոյեմբերի 8-ի ելույթը Սոչիի հայտարարության խախտում է, որովհետև եթե ընդամենը 8 օր առաջ Ադրբեջանի նախագահը ստորագրել է թուղթ, որտեղ ասում է, որ խաղաղապահների գործունեությունը պահանջված է կայունության ապահովման համար, 8 օր հետո խոսել մի լեզվով, որը հակասում է այդ տրամաբանությանը....»:
Հարցին` տեսականորեն հնարավո՞ր է արդյոք, որ 2025 թվից հետո խաղաղապահ առաքելությունը պահանջված չլինի, վարչապետը պատասխանեց.
«Տեսականորեն՝ այո՛, եթե ԼՂ հայության իրավունքների, անվտանգության ապահովման հետ կապված բոլոր երաշխիքները ստեղծված լինեն, բայց դրանք ոչ միայն պետք է ստեղծվեն, այլև կյանքով փորձարկվեն: ՌԴ խաղաղապահները առանց նման երաշխիքների հստակ ձևակերպման ուղղակի չեն կարող դուրս գալ. ԼՂ խաղաղապահ զորախումբը շփման գծի երկայնքով և Լաչինի միջանցքի երկայնքով տեղակայվել է ՌԴ Դաշնային խորհրդի որոշման հիման վրա. դրանում գրված է, որ խաղաղապահները տեղակայվում են ԼՂ բնակչության զանգվածային սպանությունները կանխելու և թույլ չտալու համար»:
Նիկոլ Փաշինյանը հիշեցրեց՝ ինքը խոսել է ցեղասպանության նախապատրաստության կամ վտանգի մասին, նշեց՝ ՌԴ Դաշնային խորհրդի որոշման մեջ էլ է դա գրված, որ խաղաղապահները տեղակայվում են այդ նպատակով և պետք է իրագործեն այդ նպատակը:
«Տեսականորեն, եթե Ռուսաստանը որոշի, որ դուրս է գալիս այդտեղից, մինչև առաքելության լրացուցիչ երաշխիքներ չստեղծի, չի կարող դուրս գալ: Եթե Ռուսաստանը ցանկություն կամ կարողություն չունի դա ապահովելու, նա ՄԱԿ-ի Անվտանգության խորհրդի անդամ է, եթե նման բան տեղի ունենա, պետք է դիմի ՄԱԿ-ի Անվտանգության խորհուրդ, ասի` տեսեք, ես ֆիքսել եմ այս սպառնալիքը, բայց չեմ կարողանում կամ չեմ ուզում հասցեագրել, դիմում եմ ՄԱԿ-ի Անվտանգության խորհրդին, որ էս հարցը լուծի»,- ասաց վարչապետը: